“رفعت عيني للسما”.. و”شرق 12″.. فيلمين مصريين هيشاركوا في مهرجان كان 2024
مع قرب انطلاق الدورة الـ 77 من مهرجان كان السينمائي الدولي في الفترة من 15 لـ 24 مايو 2024.. فيه فيلمين مصريين هيتعرضوا في المهرجان واللي يعتبر واحد من أهم المهرجانات السينمائية العالمية.
(رفعت عيني للسما – The Brink of Dreams)
فيلم “رفعت عيني للسما” هو الفيلم المصري الوحيد اللي تم اختياره للمنافسة في مسابقة أسبوع النقاد بمهرجان كان لسنة 2024، وهيتنافس السنة دي مع 6 أفلام عالمية من الولايات المتحدة الأمريكية والبرازيل وفرنسا والأرجنتين وبلجيكا وتايوان.
وهينافس الفيلم على أكتر من جايزة عالمية في المهرجان: الجائزة الكبرى كأفضل فيلم سينمائي لسنة 2024، وجائزة لجنة التحكيم الخاصة، وجائزة أفضل ممثل، وأفضل ممثلة، وجائزة أفضل سيناريو، وجائزة التوزيع.
فيلم “رفعت عيني للسما” من إخراج ندى رياض وأيمن الأمير، واتصور بالكامل في قرية البرشا في محافظة المنيا، وبيحكي قصة مجموعة بنات من أهل القرية قرروا تأسيس فرقة مسرحية وعرض مسرحياتهم المستوحاة من الفلكلور الشعبي الصعيدي، واللي بتحكي مشاكل واقعية بتواجههم زي الزواج المبكر والعنف الأسري وتعليم الفتيات. الفيلم بيحكي قصص 3 بنات وحلمهم في عالم الفن: ماجدة اللي حلمها تسافر القاهرة عشان تدرس مسرح وتبقى ممثلة، وهايدي اللي حلمها تبقى راقصة باليه، ومونيكا اللي بتحلم تبقى مغنية مشهورة.
الفيلم من بطولة فريق مسرح بانوراما برشا في الصعيد: ماجدة مسعود وهايدي سامح ومونيكا يوسف ومارينا سمير ومريم نصار وليديا هارون ويوستينا سمير مؤسسة الفريق.. والفيلم اتصور في 4 سنين متواصلة تم خلالها متابعة حياة البنات أبطال الفيلم بشكل واقعي.
(شرق 12 – East of Noon)
الفيلم المصري “شرق 12” هيتعرض في قسم أسبوع المخرجين في مهرجان كان 2024.
الفيلم من إخراج وسيناريو وحوار هالة القوصي.. وأحداثه بتدور في مزيج من الفانتازيا الساخرة والكوميديا السوداء في عالم مغلق برا الزمن عن موسيقار شاب بيحاول يتمرد على الشخص اللي بيدير العالم بتاعهم بالعنف والعبث، والموسيقار بيستعين بموهبته والحكايات الخيالية اللي بتحكيهاله ست عجوزة وبيحاول يحرر العالم بتاعهم.
الفيلم اتصور على مدار 22 يوم ما بين القاهرة والقصير سنة 2022.. ومن بطولة منحة البطراوي، وأحمد كمال، عومر رزيق وفايزة شامة، وأسامة أبوالعطا وباسم وديع، ومن تصوير عبدالسلام موسى.
