رمضان في ملاعب أوروبا.. قصص غريبة ولاعيبة تمسكت بالصيام رغم كل الضغوط
رمضان كل سنة بيحط اللاعب المسلم في أوروبا قدام معادلة صعبة.. محترف في أقوى دوريات العالم بتمارس رياضة بتعتمد على الجري والقوة والتركيز وفي نفس الوقت صايم من الفجر للمغرب من غير أكل أو شرب.. الموضوع مش مجرد عبادة شخصية ده بقى قضية رياضية وإدارية في ملاعب أوروبا.
خلال آخر عشر سنين شفنا مواقف غريبة ومؤثرة.. مباريات اتوقفت و لاعيبة رفضت تفطر و اتحادات تمسكت بلوائحها وأندية عملت برامج خاصة علشان توازن بين الدين والاحتراف.
المدفع مع الحكم
في إنجلترا الصورة مختلفة شوية سنة 2021 في ماتش ليستر سيتي وكريستال بالاس الحكم وقف اللعب فجأة علشان ويسلي فوفانا وشيخو كوياتي يكسروا صيامهم مع غروب الشمس.. اللقطة اتنقلت على الهواء مباشرة واعتبرتها الصحافة العالمية خطوة إنسانية وتحترم التنوع داخل الدوري.
الموضوع ما بقاش حالة فردية في مباراة أستون فيلا ووولفرهامبتون كمان السنة اللي فاتت الحكم أتاح فرصة لموسى ديابي ورايان آيت نوري يفطروا لحظات ويرجعوا يكملوا اللقاء.. بقى في نوع من التفاهم الضمني داخل البريميرليج إن اللاعب الصايم لما يدخل وقت المغرب ياخد دقيقة يشرب ويكمل عادي.
وفي بلجيكا سنة 2022 تقارير إعلام بلجيكي نقلت إن الحكم وقف اللعب رسميًا مع الآذان في إحدى مباريات الدوري علشان لاعبين مسلمين يفطروا.. المشهد كان بسيط تمر ومياه على خط الملعب لكن رمزيته كانت كبيرة جدًا.
موقف صارم بلا استثناءات
على العكس تمامًا فرنسا اختارت طريق تاني.. الاتحاد الفرنسي أعلن أكتر من مرة إنه مش هيعدل لوائحه ولا هيوقف مباريات علشان لاعيبة تفطر.. تقارير فرنسية كتيرة منهم صحيفة “ليكيب” اتكلمت عن جدل واسع حصل لما بعض لاعبي المنتخبات السنية تم استبعادهم بسبب تمسكهم بالصيام في المعسكرات.
الملف هناك خرج من الإطار الرياضي ودخل في نقاش مجتمعي عن العلمانية والحياد داخل المؤسسات الرياضية وده خلى فرنسا تبقى أكتر دولة أوروبية مثيرة للجدل في ملف صيام اللاعبين.
مصطفى محمد مهاجم نانت الفرنسي ولاعب منتخب مصر مر بتجربة مرتبطة برمضان والعلاقة بين الصيام والمشاركة في المباريات.. النادي كان بيواجه مواعيد مباريات خلال شهر رمضان وفي بعض المواجهات كان بيشارك كبديل في توقيت بعد الإفطار علشان الجهاز الفني مش عايز يعرضه لمخاطر الصيام الشديد قبل الماتش.
في موسم 2023 حصلت أزمة داخل نانت بسبب رفض أحد اللاعبين المسلمين وهو جوين هاجام الإفطار قبل مباراة ريمس وده خلاه يُستبعد من القائمة رغم إنه كان أساسي والمدرب قال إنه بيدعم الصائمين طوال الأسبوع لكنه ما بيقبلش عدم الأكل يوم المباراة حفاظًا على الجاهزية البدنية.
نهائي دوري الأبطال… وصلاح وماني صايمين
من أكتر القصص اللي اتغطت عالميًا كانت في نهائي دوري أبطال أوروبا 2019.. محمد صلاح وساديو ماني كانوا صايمين في ليلة النهائي مع ليفربول و تقارير زي شبكات بي بي سي وسي إن إن وقتها قالت إن الاتنين التزموا بالصيام رغم ضخامة الحدث وضغط المباراة.
الجهاز الطبي في ليفربول كان مجهز برنامج تغذية دقيق بعد الإفطار علشان يحافظوا على توازن السوائل والطاقة.. التجربة دي بقت مثال دايم على إن الصيام مش بالضرورة يمنع الأداء العالي لو فيه إعداد صح.
الصيام في قلب المنافسة
نجولو كانتي في تشيلسي كان معروف إنه بيصوم بانتظام ومدربين كتير أشادوا بقدرته البدنية رغم الصيام.. نفس الكلام انطبق على رياض محرز في مانشستر سيتي اللي تقارير إنجليزية أكدت تمسكه بالصيام خلال مواسم ضغط المباريات.
كريم بنزيما في إسبانيا كمان كان دايمًا مرتبط اسمه بالصيام خلال فترته في ريال مدريد والصحافة الإسبانية كانت بتتكلم عن قدرته على الحفاظ على مستواه رغم الالتزام الديني.
الجيل الجديد
في إسبانيا التقارير الإسبانية زي ماركا وسبورت اتكلمت عن لاعيبة زي لامين يامال وعبد الصمد الزلزولي ويوسف سابالي وموسى ديارا وكلهم بيصوموا خلال الموسم.
برشلونة وريال بيتيس وأندية تانية بقت تتعامل مع رمضان بهدوء من غير صخب إعلامي لكن من خلال برامج تغذية وتعديل توقيتات تدريب بسيطة علشان تحافظ على جاهزية اللاعبين.
لاعيبة رفضت تفطر رغم الضغوط
في بعض الحالات خصوصًا في فرنسا حصل إن لاعيبة تمسكوا بالصيام رغم ضغوط غير مباشرة للإفطار في المعسكرات أو المباريات المهمة بعضهم تقبل تقليل دقائق مشاركته وبعضهم خرج من الحسابات مؤقتًا.
الموضوع بيبقى شخصي جدًا لكن في نفس الوقت له تبعات احترافية خصوصًا لما المدرب يكون شايف إن الحالة البدنية ممكن تتأثر.
الصيام بيعمل إيه في جسم اللاعب؟
دراسات منشورة في British Journal of Sports Medicine وضحت إن الصيام ممكن يقلل من نسب الترطيب ويأثر على التحمل خصوصًا في الأجواء الحارة.. ساعات النوم كمان بتتغير بسبب السحور وده بيأثر على الاستشفاء.
لكن في المقابل بعض اللاعبين والمدربين بيأكدوا إن الصيام بيعزز التركيز الذهني والانضباط بمعنى إن التأثير مش واحد على الكل وبيعتمد على طريقة التحضير.
الأندية الكبيرة اتعلمت إزاي تتعامل
ليفربول ومانشستر سيتي وبرشلونة من أبرز الأندية اللي طورت أنظمة خاصة لرمضان.. برامج تغذية مخصصة ومراقبة سوائل الجسم و تعديل بسيط في الأحمال التدريبية وكل ده علشان اللاعب يقدر يوازن بين التزامه الديني وأدائه الفني.
الموضوع بقى جزء من إدارة الموارد البشرية داخل النادي مش مجرد قرار فردي من اللاعب.
أوروبا مش على رأي واحد.. إنجلترا وبلجيكا بيميلوا للمرونة ودول زي إسبانيا بتتعامل بهدوء في المقابل فرنسا متمسكة بالقواعد بدون استثناءات.
لكن الثابت إن عدد اللاعبين المسلمين في أكبر الدوريات الأوروبية بيزيد كل سنة وملف الصيام بقى واقع أساسي لازم يتدار باحتراف.
وفي النهاية رمضان في ملاعب أوروبا مش مجرد قصة امتناع عن الأكل والشرب.. دي قصة إرادة وتوازن. لاعب بيجري 10 أو 11 كيلو في الماتش وهو شايل جواه التزام ديني عايز يحافظ عليه.
