رواياته ضمن أفضل 100 رواية عربية.. ترشيحات روائية للأديب صنع الله إبراهيم

النهاردة توفي الأديب الكبير صنع الله إبراهيم عن عمر يناهز 88 سنة بعد مسيرة كبيرة في الأدب العربي.. ده غير اهتمامه بقضايا الوطن العربي اللي بتظهر في رواياته وأفكاره.. فهنحكيلك إزاي كان علامة من علامات الأدب المصري وهنقولك عن ترشيحات لأهم رواياته

عن ميلاده ودراسته وأفكاره

الأديب صنع الله إبراهيم اتولد يوم 24 فبراير سنة 1937 بالقاهرة.. وتربيته كانت بين كتب والده اللي شجعه على القراءة والتفكير ودي كانت أول حجر أساس في تكوين الشخصية الأدبية والفكرية ليه.. وبعد ثورة 1952 قرر صنع الله إبراهيم يدخل كلية الحقوق وبعدها بسنتين حاول ينضم للحزب الاشتراكي اللي لقى تعارض كبير بين أفكاره وأفكار الحزب.. فانضم لمنظمة “حدتو” ودي منظمة من المنظمات الشيوعية في مصر.. وبعدها اتسجن 5 سنين بسبب حملة عملها الرئيس جمال عبد الناصر ضد اليسار

ترشيحات لأهم رواياته

• رواية “بيروت بيروت”

بتحكي عن الحرب الأهلية اللبنانية اللي قدر يقدم فيها نقد للصراعات بين الفصائل اللبنانية والعنف الطائفي هناك.. وتأثير الحرب دي على المدنيين وحياتهم اليومية.. وحكى عن دور التدخلات الخارجية في الصراع بنظرة مستقبلية عن شكل المنطقة العربية

• رواية “شرف”

بتحكي الرواية عن “أشرف” أو “شرف” زي ما والدته كانت بتناديه.. اللي بيدخل السجن في جريمة قتل وهو بيدافع عن شرفه.. وبيعيش “شرف” رحلة من الخوف والظلم والفساد في السجن وبيقرر يستسلم لعالم السجن المخيف.. والرواية دي من أدب السجون وخدت المركز التالت ضمن قائمة اتحاد الكتاب العرب لأفضل 100 رواية عربية

• رواية “ذات”

أحداثها بتحكي عن قصة الست المصرية “ذات” من طفولتها لحد جوازها من “عبد المجيد” وتربية ولادهم في ظل التغيرات الاجتماعية والاقتصادية اللي حصلت من ثورة 23 يوليو 1952 لحد ثورة 25 يناير 2011.. واللي اتحول لمسلسل تلفزيوني اسمه “بنت اسمها ذات”.. وكانت “ذات” الرمز اللي حاول الكاتب يوصف المجتمع المصري اللي بتحصله تغيرات كتيرة سواء في أفكاره أو معتقداته

• رواية “وردة”

الرواية بتحصل أحداثها في فترة ثورة جبل ظفار المدعومة من الثورة اليمنية في الستينيات ضد السلطنة العمانية.. ونضال الست العربية من خلال شخصية “شهلا” المناضلة اليمنية اللي كان اسمها الحركي “وردة” واللي بتعرف عن نضالها في الصورة من خلال مذكرات بيلاقيها صحفي مصري عنها وهو بيدور عليها وعلى أخوها.. وبتناقش فكرة الهوية والانتماء ومواقف إنسانية بتحصل وقت الظلم

• رواية “نجمة أغسطس”

بتحكي الرواية عن أهم حدث في تاريخ مصر الحديث وهو بناء السد العالي.. وبتدور أحداث الرواية في أسوان وقت بناء السد العالي وبتعيشك تفاصيل دقيقة عن حياة العمال اللي شاركوا في بناء السد العالي.. وطريقة نقل معبد “أبو سمبل”

• رواية “أمريكانلي”
  

أحداثها بتكون في أمريكا وبتحكي عن شخصية الدكتور “شكري” اللي بيحاضر مادة التاريخ في “سان فرانسيسكو”.. وكانت فصوله بتضم طلبة مختلفين في العرق والدين والثقافة.. وبتنقل الرواية صورة عن المجتمع الأمريكي وتناقضاته

• رواية “الجليد”

الرواية دي بتحكي تجربة شخصية عاشها الكاتب صنع الله إبراهيم وده بيحصل من خلاص شخصية الدكتور “شكري” اللي كان بيحضر للدكتوراه بتاعته في روسيا.. وبتوضح الرواية أسباب إنهيار الاتحاد السوفيتي

وفي النهاية يمكن صنع الله إبراهيم مشي عن عالمنا بس هتفضل رواياته علامة مميزة في تاريخ الأدب المصري والعربي.. لأنه ماكنش مجرد روائي هو كان صوت الضمير والتفكير