رياضة “صفع الوجه”.. لما الهزار يقرر يبقى بروفيشنال
لو عمرك تخيلت إن الخناقة اللي بتحصل بينك وبين صاحبك أو أخوك على أخر قطمة في السندوتش أو على أي حاجة عمومًا ممكن تتحوّل لرياضة عالمية؟.. أحب أقولك إن في ناس فعلاً سبقوك للخطوة دي! ودي رياضة دلوقتي اسمها “صفع الوجه” أو “التلطيش”
الناس بتقف قدّام بعض بالتراضي وبكامل قواهم العقلية وياخدوا دورهم في توزيع “قلمين” رسميين ومعتمدين وبشهادة الجميع وبحضور حكّام وأضواء وكاميرات وكمان جمهور بيشجّع
الموضوع وراه تاريخ وناس اخترعوه من أكتر من 10 سنين واتحوّل بعد كده لبطولات محترفة بتتذاع وبتتحسب بالنقط والجولات عادي
يعني اللي داخل يقرأ دلوقتي ومهتم.. مش بس بيشوف رياضة غريبة ده داخل على قصة رياضة كاملة: مين بدأها.. اتأسست إمتى وإزاي في يوم وليلة بقت واحدة من أكتر الألعاب اللي الناس بتتفرج عليها أونلاين؟
ولو رجعنا لبداية الموضوع هنلاقي إن رياضة “صفع الوجه” ما كانتش موجودة بالشكل الاحترافي ده غير من 2015 والفكرة الرسمية لرياضة «صفع الوجه» (slap fighting) بمعنى تنظيم نزالات بصفعات بيرجع لـ SlapFIGHT Championship) SFC)
جي تي تيلي مؤسس اللعبة عمل بطولة اسمها SlapFIGHT Championship.. ودي كانت أول محاولة حقيقية لتنظيم اللعبة بشكل رسمي: جولات و حكّام وقواعد ومنافسين.. ومن هنا بدأت اللعبة تاخد شكل رياضة موثّقة مش مجرد فيديوهات ساخرة
الموضوع ما وقفش على SFC.. شهرة اللعبة زادت جدًا على الإنترنت وده خلّى ناس كبار في عالم الرياضات القتالية يبصّوا عليها.. أهم واحد فيهم كان دانا وايت رئيس بطولة الفنون القتالية
الراجل شاف شهرة اللعبة وإقبال الناس عليها وقال: “طب ليه ما نعملش نسخة احترافية كاملة؟”.. وبالفعل في سنة 2022 أعلن عن تأسيس بطولة جديدة اسمها Power Slap
وعشان تبقى فاهم أكتر اللعبة عبارة عن: كل ماتش متقسّم جولات وكل لاعب بياخد دوره يا إما يهاجم أو يدافع بعد كل صفعة اللي اتصفّع عنده لحد 60 ثانية علشان يرجّع توازنه ولو حصل أي حاجة خطيرة الحكم أو الطيب بيقدر يوقف الماتش فورًا
واللعبة دي ليها قواعد وعقوبات زي أي رياضة تانية.. يعني مثلًا في سنة 2023 بعض مقاتلي الصفع تم توقيع عقوبات عليهم: 6 منافسين اتوقّفوا وتغّيرت نتائج نزالاتهم بعد ما ظهرت إيجابية لفحوصات منشطات.. ودي تاني أكتر حاجة بيكتشفوها في البطولة لأن اللي جاية هي أول حاجة
في شهر سبتمبر لسنة 2024 ظهر بحث من جامعة أمريكية حلّلت إصابات الارتجاج في اللعبة والنتائج كانت مرعبة جدًا.. والدراسة دي كشفت إن جزء كبير من اللاعبين بيبان عليهم أعراض ارتجاج بعد “الصفعة”: حوالي 40% بيتهزّ توازنهم و33% بتظهر عليهم “النظرة الفاضية” و25% بيقعوا أو ما يقدروش يرجعوا بسرعة.. يعني اللعبة فيها معدّل عالي جدًا من علامات إصابة الدماغ.. ووارد اللاعيبة يحصلهم أي إصابة تخليهم يبقوا في حتة تانية من اللا وعي عمومًا
ولحد دلوقتي يعني في 2025 سلسلة باور سلاب (Power Slap) مستمرة في تنظيم بطولات عالمية ووصلت لنسختها الـ17 والمرة دي في الرياض
أما بقى لو عايز تعرف مين هما أبطال اللعبة.. ففي الوزن المتوسط البطل هو الأمريكي هو كول يونج.. أما في الوزن الثقيل ففاز الروسي فاسيلي كاموتسكي المعروف بلقبه “دمبلينج” على خصمه “ذا كريزي هاواياني” ومسيطر على الوزن ده
وفي النهاية عايزين نقول أن اللعبة دي فيه ناس هتتفق عليها كـ”رياضة” وناس هتختلف.. وسواء شايفها رياضة.. هزار.. جنون.. أو حتى محتوى للضحك.. حاجة واحدة محدش يقدر يختلف عليها: لعبة “الصفع” قدرت تعمل دوشة في عالم الرياضات وتثبت إن الشهرة مش دايمًا بتحتاج مهارة خارقة.. لا ساعات كل اللي محتاجاه “لطشة” مظبوطة في التوقيت الصح.. بس ليه الواحد ممكن يعمل في وشه كده ؟
