ريميك لـSplinter Cell وجزء جديد من Sniper Elite.. وأخبار تانية في الملخص الأسبوعي
مساء الفل.. الأسبوع ده كان فيه ميكس من الأخبار اللطيفة واللي هيحبها الجيمرز.. وخلينا نبدأ بالخبر الأهم من وجه نظري واللي هيحبه جدا الجيمرز القدام.
شركة “Ubisoft” أعلنت عن وجود ريميك للعبة “Splinter Cell”، بعد سبع سنين من إطلاق لعبة “Splinter Cell: Blacklist”.
اللعبة بيتم تطويرها حاليا من فريق “Ubisoft Toronto” وباستخدام محرك “Snowdrop” الخاص بشركة يوبيسوفت.. فا نسأل الله التساهيل نشوفها في أقرب وقت ممكن.
الاستريمر وصانع المحتوى “Dr Disrespect” أعلن إنه هيعمل استوديو لتطوير الألعاب بميزانية كبيرة جدا وهيكون اسمه “Midnight Society” ولكن مش ده المهم.
ولكن الأهم هو إن الاستوديو فيه مطورين سابقين اشتغلوا على ألعاب مهمة زي “Call of Duty” و “Halo”.. وحسب موقع “IGN” في نسخته العربية، قال إنه بيهدف إنه يشارك مع مجتمع اللاعبين وصناع المحتوى في عملية تصميم الألعاب وده لو حصل هيكون خطوة مهمة لإن زي ما إحنا عارفين، الاستوديوهات في أغلب الوقت بتنفض للاعبين وأرائهم أو اقتراحاتهم عن الألعاب.
استوديو “Rebellion” المطور للعب “Sniper Elite” أعلن عن وجود جزء خامس من اللعبة وهيتوفر على المنصات المنزلية زي “PS” و “Xbox” وكمان للكمبيوتر خلال عام 2022
شركة سوني أعلنت إنها هتطرح أغطية خارجية لأجهزة “PS5” بألوان جديدة ومتوافقة مع ألوان وحدات التحكم بداية من شهر يناير الجاي، والأغطية دي هيتم فكها وتركيبها للنسختين من الجهاز.. سواء كانت الرقمية أو النسخة الـ CD.
لقطة غريبة جدا حصلت الأسبوع ده، لما النجم كيانو ريفز صرح إنه ملعش لعبة “Cyberpunk 2077” رغم إنه ظهر فيها بدور رئيسي ضمن اللعبة، ولكن مطور اللعبة كان قال من سنة إن كيانو لعب اللعبة وعجبته جدا.. موقع “IGN” في نسخته العربية قال إنهم حاولوا التواصل مع المطور عشان يعلق على القصة دي ولكن مردش.. وأكيد مش هيرد ده موقف محرج الحقيقة ربنا ما يحط حد فيه!
