سباق المشي.. لعبة بتشد الانتباه وتحيّر المشاهد

سباق المشي واحد من أكتر الألعاب اللي بتلفت النظر في الأولمبياد رغم إن ناس كتير بتقف قدامه مستغربة أو حتى ضاحكة من شكله المختلف وسط سباقات الجري السريع والألعاب القوية.. المشهد بيبقى مجموعة لاعبين بيمشوا بسرعة غير طبيعية وأنت مبتكنش عارف لا هم بيجروا ولا هم ماشيين عادي وده دايمًا بيخلّي السؤال يتكرر هو ده بجد سباق رياضي ولا مجرد فقرة غريبة وخلاص بس الحقيقة إن اللعبة دي ليها تاريخ طويل وقوانين صارمة وبتحتاج مجهود وتركيز كبير جدًا.

يعني إيه سباق المشي ؟

سباق المشي أو Race Walking رياضة رسمية ضمن ألعاب القوى ومعترف بيها دوليًا والفكرة إن اللاعب يمشي بأقصى سرعة ممكنة من غير ما يجري ولا ثانية واحدة والسباقات بتتلعب على مسافات طويلة زي 20 كيلومتر و35 كيلومتر واللي يكسب هو اللي يقدر يوازن بين السرعة والالتزام بالقانون لحد خط النهاية. 

ليه الطريقة غريب ؟

الطريقة اللي اللاعبين بيمشوا بيها مش اختيار شخصي ولا استعراض والقوانين بتفرض إن دايمًا تكون فيه قدم لمسة الأرض وممنوع الاتنين يسيبوا الأرض في نفس اللحظة وكمان الرجل الأمامية لازم تفضل مستقيمة من أول ما تلمس الأرض لحد ما الجسم يعدي فوقها.. والشروط دي بتخلي اللاعب يهز وسطه ويحرك جسمه بشكل واضح علشان يحافظ على سرعته من غير ما يتحسب عليه جري.

بس كتير فاكرين إن سباق المشي بيطلع بس وقت الأولمبياد لكن الحقيقة إنه ليه بطولات عالمية وقارية ومحلية بتتلعب طول السنة بس الأولمبياد هو أكبر مسرح للعبة وعلشان كده بتظهر بقوة كل أربع سنين وتشد انتباه الجمهور اللي مش متابعها طول الموسم.

 من الشوارع للأولمبياد

بداية سباق المشي كانت في إنجلترا في القرن الـ19 لما كانت بتتعمل تحديات مشي لمسافات طويلة مقابل جوائز وفلوس.. ومع الوقت الرياضة اتنظمت وبقى ليها قوانين واضحة ودخلت ضمن ألعاب القوى وأول ظهور ليها في الأولمبياد كان سنة 1904 ومن ساعتها وهي جزء ثابت من البرنامج الأولمبي.

قوانين وتحكيم صعب

القوانين في سباق المشي واضحة لكنها صعبة التطبيق جدًا خصوصًا مع التعب والمسافات الطويلة والحكام بيعتمدوا بشكل كبير على العين في رصد المخالفات.. وبيتم توجيه إنذارات للاعبين وأي لاعب يحصل على تلات إنذارات بيتم استبعاده فورًا مهما كان مركزه في السباق وده بيخلّي المنافسة دايمًا مشتعلة ومتوترة.

نجوم صنعوا التاريخ

سباق المشي ليه نجوم كبار على مدار السنين ومن أبرزهم في العصر الحديث الصينية يانغ جيايو بطلة أولمبياد باريس وصاحبة رقم عالمي في 20 كيلومتر ومعاها الإسبانية ماريا بيريز بطلة العالم وصاحبة الرقم القياسي في 35 كيلومتر.. وعلى مستوى الرجالة بيبرز الكندي إيفان دانفي والبرازيلي كايو بونفيم اللي قدر يحقق أول ذهبية عالمية لبلاده في سباق المشي.

 في النهاية سباق المشي ممكن يبان غريب أو مضحك لأول وهلة لكنه واحد من أصعب رياضات التحمل في الأولمبياد فاللعبة دي مش مجرد مشي لكنها اختبار قاسي للصبر والتركيز والانضباط البدني.. ومع فهم تاريخها وقوانينها بتبدأ تشوف السباق بشكل مختلف وتدرك إن الغرابة اللي باينة هي جزء من صعوبة اللعبة نفسها.