سباق حمل الزوجات.. رياضة من حكايات الغابات للعبة عالمية
سباق حمل الزوجات واحد من أغرب الرياضات اللي ظهرت في العالم.. لعبة شكلها بسيط بس وراها حكاية طويلة وقواعد دقيقة وبطولة عالمية بتتعمل كل سنة في فنلندا.. الفكرة واضحة راجل بيجري وهو شايل زوجته أو شريكته وبيعدي مضمار مليان عوائق.. اللي يوصل الأول يكسب.. ومع الوقت اللعبة خرجت من إطار الهزار وبقت رياضة ليها جمهور وفيها منافسة حقيقية.
البداية من الغابات الفنلندية
أصل اللعبة راجع لنهاية القرن الـ19 في فنلندا.. وفي أكتر من رواية بتحكي عن البداية.. أشهرهم قصة هيرمان هيركو رونكاينن زعيم عصابة في الغابات.. الحكايات بتقول إنهم كانوا بيسرقوا أكل وأحيانًا ناس من القرى ويهربوا وهم شايلينهم على ضهرهم.. ومع الوقت الفكرة اتحولت لتحدي بين الشباب.. وفي رواية تانية بتقول إن حمل الأوزان كان تدريب بدني وبعدها بقى مسابقة شعبية.
من الشعبية لبطولة عالم
اللعبة اتسجلت رسميًا لأول مرة سنة 1992 باسم بطولة العالم لحمل الزوجات.. في الأول كانت مقتصرة على الفنلنديين بس.. وبعد سنة 1995 اتفتحت للعالم وبقى يشارك فيها متسابقين من دول مختلفة وبدأت تاخد طابع دولي واضح.
إزاي السباق بيتلعب؟
السباق بيتلعب على مضمار مخصوص طوله حوالي 253.5 متر.. فيه رمل وحواجز وعقبات مياه.. واللاعب لازم يعدي كل ده وهو شايل شريكته وده محتاج قوة وتوازن وسرعة وتفاهم كبير.. أي غلطة ممكن تضيع الفوز
قوانين بتحكم المنافسة.
وفيه قواعد واضحة للعبة.. اللي بيتحمل عليه لازم يكون عمره فوق 17 سنة ومش شرط يكون زوجة رسمية.. الوزن لازم ما يقلش عن 49 كيلو ولو أقل بيتضاف وزن صناعي.. وطريقة الشيل مفتوحة سواء على الظهر أو الكتف أو بالطريقة الإستونية اللي بتبقى فيها الشريكة مقلوبة.
بطولة العالم في فنلندا
بطولة العالم بتتعمل كل سنة في شهر يوليو في بلدة سونكايارفي الفنلندية.. الحدث بقى مهرجان جماهيري كبير فيه موسيقى وضحك وأزياء غريبة ومنافسة قوية.. في نسخة 2018 شارك 53 فريق من 13 دولة وفازت ليتوانيا على أصحاب الأرض.
انتشار اللعبة حول العالم
اللعبة انتشرت بره فنلندا ووصلت لأمريكا الشمالية من سنة 1999 وبقت ليها سباقات بتأهل لبطولة العالم.. وفي بريطانيا وأمريكا بتتعمل بطولات بمسافات أطول وعوائق مختلفة بتضيف متعة وإثارة.
أغرب جائزة في الرياضة
الفريق الفايز في بطولة العالم بياخد كمية بيرة بوزن الزوجة اللي اتشالت.. وكل ما الوزن زاد الجائزة تكبر.. وده حافظ على روح المرح اللي اللعبة معروفة بيها رغم المنافسة القوية.
أساطير وأبطال السباق
وأخيرًا وعلى مدار السنين ظهر أبطال كتير في اللعبة زي Jouni Jussila وTiina Jussila وبعدهم نجوم زي Taisto Miettinen وKatja Kovanen.. وفي 2025 فريق Caleb وJustine Roesler خطفوا الأضواء بأداء قوي.. ومع الوقت سباق حمل الزوجات بقى رمز للتعاون والثقة بين الشريكين ومثال لرياضة مختلفة بتجمع بين التحدي والضحك وروح المنافسة.
