سر مقولة”الملتفت لا يصل” وهل فعلًا حقيقة ولا أي كلام!
في مقولة مشهورة بنستخدمها في حياتنا اليومية بتقول “الملتفت لا يصل” ومش معروف تحديدًا مين اللي قالها بعض الناس بتقول “جلال الدين الرومي” والبعض بيقول “الحلاج” والبعض بيقول واحد من العارفين قالها زمان!.. بس بغض النظر عن مين أحدهم اللي مر وقالها لكنه كان عنده رؤية ووجهة نظر حكيمة.. عشان كده هنقولك في الموضوع ده الالتفات ممكن يعمل فينا إيه!
الالتفات هو إنك تبص جنبك أو وراك طول الوقت.. وأنك تكون عايز تعرف اللي حواليك وصلوا لفين وإزاي بسبب ومن غير سبب.. يعني من الأخر إنك تشغل نفسك بحاجات وتستهلك مجهودك ووقتك بدل ما تستثمره في مستقبلك.. بس هل ده هيوديك في حتة ولا هيعطلك بس ويشتتك؟
الالتفات بيخلينا نقارن نفسنا باللي حوالينا حتى لو كنا ناجحين برضه.. بس بنسأل نفسنا هما وصلوا فين وليه إحنا مش مكانهم؟ الكلام يبان كيليشيه بس مين قال إن الناس اللي بنقارن نفسنا بيهم أصلا شايفين إنهم وصلوا أو مرتاحين؟.. مش يمكن عندهم معاناة من نوع تاني إحنا مش شايفينها؟
وكمان فكرة الالتفات بتوصلنا لمقارنة مش متكافئة لأننا بنقارن نقاط قوتهم بنقاط ضعفنا وده مع الوقت بيقلل ثقتنا في نفسنا وهيخلينا حاسين إننا مش كفاية وإن لازم نجري ومهما جرينا مش هنرتاح أو نكون مبسوطين.. لأننا في سباق مابينتهيش فيه طرف واحد بس وهو نفسنا مع ناس مش عارفة إنهم في المنافسة وهياخد ده من طاقتنا كتير وبالتالي هنوصل أبطأ لأننا عطلنا نفسنا بنفسنا!
والمقارنات ممكن تودينا لفين كمان؟
-ممكن تخلينا نحاول ناخد الـ validation من الناس اللي حوالينا ونبهرهم بأي وسيلة من خلال السوشيال ميديا أو إننا نعمل حاجات تلفت انتباههم عشان نحاول نبقى زيهم مهما كانت غريبة في سبيل بس إننا نتشاف ناجحين.
-أو نحاول نبين ثقة بالنفس وهمية وإننا أحسن حد في الدنيا مع إن ده مابيكونش حقيقي وبتبقى مجرد سلوك دفاعي نبين فيه إننا مابيهمناش رأي حد فبنحاول نتظاهر بشخصية لا تقهر.
– أو ممكن نحاول نهتم بحاجات سطحية فاكرين إنها اللي ميزت الأشخاص التانية بطريقة تعطلنا عن الحاجات اللي فعلا مهمة في حياتنا زي شغلنا وحياتنا الإجتماعية.
طيب إزاي ممكن نبطل نلتفت ومانقارنش نفسنا بحد!
إننا نبص بس على اللي إحنا بنعمله ونقدره ونكون عارفين إن كل شخص عنده حاجة فقد قصادها حاجة تانية فبالتالي عمر ما المقارنات هتكون عادلة وعمر الالتفات ما هيعمل حاجة غير إنه يوقعنا لأننا هنقضي وقت كبير بنحاول نثبت فيه إننا واثقين في نفسنا ونبهر فيه الناس والأولى نستثمر الوقت ده في الحاجات المهمة لمستقبلنا فعلا!
وافتكر دايمًا إن الشخص الوحيد اللي يستحق إنك تقارن نفسك بيه هو إنت زمان وإنت دلوقتي… يعني من الأخر شوف كنت فين ووصلت لفين وطالما بتتطور مش مهم أي حد تاني حواليك!
