سلسلة حكايات يومية عادية حكاية 2: البنت أم نضارة Pink
عارفين في الأفلام لما البطل أو البطلة يومهم بيبقى متشقلب خالص بس بتحصل حاجة تخليهم يكتشفوا حاجة عن نفسهم.. اهو ده اللي حصل النهارة بالظبط كنت صاحية مقريفة وعايزة اجيب قهوة عشان أفوق قبل الشغل وعيني كانت واجعاني أوي ماكنتش اعرف إن الليزك تأثيرها مقرف.. وفضلت امسح عيني بمنديل
فجاة لقيت حد بينادي عليا “نور” وكمل:” إنتي نور؟.. مش فاكراني؟”
“أنا محمود.. كنت معاكي في نفس الفصل وإحنا صغيرين!”
بدأت اركز في ملامحه واكتشفت إني عارفاه شكله ماتغيرش خالص
أول حاجة قولتهاله “أنت عرفتني إزاي من غير النضارة “
ضحك وقالي “من العياط.. شكلك لسه حساسة زي زمان”
قولتله:”بس أنا ماكنتش بعيط!”.. حس بالإحراج وقالي:”أنا بهزر معاكي أنا عارف شكلك من فيس بوك.. أول مرة شوفت الأكونت بتاعك ماصدقتش نفسي لما نزلتي إنك بتدوري على صحابك بتوع إبتدائي في الجروب
قولتله: اه كلهم كتبوا البنت اللي بنضارة pink
قالي: وكمان حرف الـ س لسه بفتكر صوتك وإنتي بتقولي “يا مثتر” و”يا “ميث”
حسيت وقتها إني عايزة اختفي حسيت إنه بيتنمر عليا في أكتر حاجتين بيضايقوني من صغري.. النضارة اللي لبستها غصب عني وحرف الـ س الضايع”
اعتقد إنه حس إن في حاجة غلط وقالي “هو أنا ضايقتك؟”
رديت بغضب وقولتله”الحقيقة إن الحاجات دي مش مجال هزار”
قالي: بس أنا مش بتنمر عليكي إنتي عارفة أن دول من أحلى الحاجات فيكي اللي كلنا لسه فاكرينك بيها “قولتله: كلنا! كلنا مين؟ أنا ماحدش أصلا كان بيحبني
قعد يضحك بشكل استفزني لدرجة إني كنت خلاص همشي.. بس كمل كلام وقال: “أستني بس هوريكي حاجة”..طلع موبايله ووراني صورة جماعية وإحنا صغيرين وقالي:على فكرة إنتي كنتي محبوبة شايفة دول وشاورلي على كذا حد من الدفعة وقالي كانوا بيحبوكي زمان..قولتله: أنا أول مرة أعرف إني اتحبيت من حد”
قالي:أنا أسف بس إنتي غبية بجد إنتي أكتر حد لسه فاكرينه وبنسأل عليه لما بنتقابل هو ليه الناس هتفتكر حد ماكانوش بيحبوه! وبالعكس النضارة كانت كيوت ومميزاكي وحتى الـ س وحساسيتك مش كل الحاجات دي هي اللي خليتك إنتي؟.. وكمل
على فكرة إنتي كنتي أكتر واحدة بحبـ.. بحب ألعب معاها!
اكتشفت اللحظة دي إني كنت شايفة نفسي غلط طول الوقت!.. قولتله: شكرا على كلامك أنا فعلا كنت محتاجة أسمعه..أنت عارف فكرتني بمقولة كنت بشوف الناس بتشيرها بتقول: “كل عين تراكَ على قدر حبها لك، فعين المحب ترى العيوب مفاتن”
قالي: العيوب؟ إنتي بجد لسه لحد دلوقتي شايفاها عيوب!”
قولتله: ياريت الكلام ده كان جه بدري شوية
قالي: بس إحنا لسه فيها It’s never too late to start again يا نور.
