سلسلة حكايات يومية عادية.. حكاية 23: “ليه اللي بتعوزه مابيحصلكـش؟”
لما بتقرر تقعد مع نفسك.. وتبدأ تتحسر على نفسك وأحلامك وتسأل أسئلة وجودية زي “ليه الحاجة بتيجي لحد عندي ومابتحصلش؟”
قبل ما تعيط.. فكر في سؤال تاني وهو “لو دخلت فرن تجيب بـ 8 جنيه فينو.. بتشغل بالك تعرف كواليس وخطوات خبز الفينو لحد ما تاخده ولا بتاخده وتقول الحمدلله؟” بس قبل ما تجاوب خليني أحكيلك حدوتة الأول!
وأنا في ثانوية عامة كان عندي مشكلة مع قصة “الأيام” بتاعة الأديب طه حسين.. كنت أقفل نحو وبلاغة بس أجي عند القصة معرفش ولا أذاكرها ولا أحفظ حاجة فيها.. وكنت أقول أكيد هلمها.. وطبعًا كلنا عارفين مصيرنا إيه بعد الجملة دي.. أه “زنقة الكلاب”.. المهم أسبوع قبل امتحان العربي.. تكتكت لخطة قدرت ألم بيها القصة كلها وأراجع العربي بكل فروعه مش بس مرة لا.. دول 3 مرات.. بس في آخر 3 أيام قبل الامتحان حصل حاجة ماكنتش عاملة حسابها وهي إن الدنيا تسود قدام عيني!
كنت بصحى ألاقي الرؤية مش واضحة من الجزء الشمال وبالتدريج صحيت في يوم لقيت عيني كلها قفلت ومابقتش شايفة غير سواد.. اكتشفت إن عندي مشكلة في الجزء الشمال من وشي مخلياه وارم لدرجة إنه قفل عيني..قبل ما أنام ليلة الامتحان طلبت من ربنا حاجة واحدة بس.. أدخل إعلام ويعدي كل اللي بيحصل ده على خير!
دخلت الامتحان وعلى العكس من المعتاد كنت في قمة الهدوء ومش متوترة.. المهم وأنا بحل النصوص والقراءة كان فيه كلمة [اختياري] جنب كل سؤال من الفرعين.. فقررت أحل واحد مع السؤال الإجباري وأسيب التاني.. وقولت آخر الوقت أبقى أحل الاختياري.. بس نمت وقولت مش مشكلة بقى أنا مخلصالهم اللي طالبينه مني.. خرجت من الامتحان و سألتني صاحبتي: “عملتي جمع كذا إيه؟”.. باستهزاء رديت: “لا كانت اختياري محلتهاش اخترت التاني”.. تضحك صحبتي وتقول: “ماتهزريش بقى عملتيه إيه؟”.. قولتلها: “ماحلتهاش فعلًا فين الضحك؟”.. بحذر صحبتي بترد: “إحنا دفعة البوكليت بنحل كل أسئلة الورقة!”
روحت البيت بصدمة وانهيارات سمعت عمارتنا كلها.. إزاي هعرف أجيب مجموع إعلام ده أنا كده معنديش فرصة للغلط في الامتحانات الجاية.. طب ده أنا يارب ماطلبتش منك غير إني أدخل إعلام وكل حاجة تعدي على خير.. ليه اللغبطة اللي بتحصلي دي؟! أنا كده بعيدة أوي عن الخطة اللي راسماها في دماغي عشان أحقق حلمي من طفولتي
في الآخر حصل اللي كنت عاوزاه ودخلت إعلام.. جايز بخطة أحداثها مختلفة عن ما كنت عاوزة بس النتيجة واحدة.
بعدها اتعلمت إن مش لازم أسيطر على الأحداث.. وإن ممكن تكون بتطلب وردة من ربنا بس هو شايلك جنينة.. ركز إن ربنا في الآخر بيحققلك أمنتيك اللي بتطلبها منه ومش شغلانتك بقى ده هيحصلك إزاي.. المهم إنها بتحصلك وقلبك بيتداوى.
ها عرفت دلوقتي إجابة السؤال اللي سألتهولك في الأول؟ أكيد هتنبسط أكتر لما تاخد الـ 8 جنيه فينو وتاكل عيش يا عم وتنام مبسوط!
