شخبط شخابيط.. واعرف بتقول إيه عن شخصيتك؟

كام مرة كنت قاعد سرحان أو بتتكلم في الموبايل مكالمة طويلة ولقيت نفسك ماسك ورقة وقلم وعمال تشخبط.. وبعد ما خلصت لقيت نفسك عامل “تحفة فنية” غير مفهومة؟
وغالبًا هتلاقي نفس النمط بيحصل كل مرة في الشخبطة.. وده خلانا ندور شوية ورا الموضوع ولقينا إن الشخبطة ممكن تقول شوية حاجات عنك.

خلينا الأول نقول إن الشخبطة هي رسم عفوي وغير متناسق ولما بتكون بتعمله انت مابتكونش مركز في الرسم نفسه.. فالمرة الجاية بعد ما تخلص شخبطة.. امسك الورقة واقرأ اللي جي ده.

موقع Inkmeo اتكلم عن الشخبطة وحدد شوية حاجات كده لو موجودة فممكن تكون دليل على حاجات معينة.

خطوط مستقيمة كتير وزوايا حادة

ده بيكون غالبًا دليل على شعور الشخص بالقلق أو الضغط النفسي وأوقات كتير الخطوط والزوايا دي بتمثل عقبات في حياة الشخص

دوائر ومنحنيات

الشخبطة اللي بيكون فيها دواير ومنحنيات كتير بتدل على إن الشخص في حالة ذهنية مستقرة ومسترخي وعنده شعور بالانسجام والتوازن

نقاط وخطوط عشوائية

ده ممكن يكون دليل على حالة من التشتت أو عدم التركيز وساعات بيكون رسمها شعور داخلي إن الواحد محتاج ينظم أفكاره

صور أو رموز

لما بيكون فيه رموز أو رسومات واضحة في الشخبطة ده بيكون إشارة لحالة ذهنية مستقرة وإن الشخص عنده مشاعر محددة وساعات الشخبطة دي بتكون تعبير عنها

بعد ما قريت أنواع الشخبطة.. قولنا انت مين فيهم ولا بتشخبط حاجة تانية خالص؟