شركات كتير علقت أعمالها في روسيا.. وطرح لعبة Apex Legends Mobile وأخبار تانية في الملخص الأسبوعي

مساء الفل، الأسبوع اللي فات اتكلمنا عن دخول سوق الألعاب في الغزو الروسي لأوكرانيا، وده بعد ما قامت شركة EA بإزالة المنتخب والفرق الروسية من ألعابها زي FIFA و NHL بالإضافة لدعوة نائب رئيس الوزراء الأوكراني “ميخايلو فيدوروف” بلايستيشن وإكس بوكس إنهم ينسحبوا من السوق الروسي بشكل كامل، واللي واضح إنه اتحقق بالفعل.

موقع The Verge قال إن شركة Sony Interactive Entertainment وقفت كل شحنات الأجهزة لروسيا، بالإضافة لتعليق إطلاق لعبة Gran Turismo 7 وكل عمليات متجر بلايستيشن في روسيا.

والشركة ماكتفتش بكده بس، ولكن قالت إنها هتتبرع بـ 2 مليون دولار لمفوضية الأمم المتحدة لشؤون اللاجئين ومنظمة Save the Children لدعم المتضررين من الغزو، حسب بيانها.

البيان كمان قال إنه تم تعليق عمليات بيع لعبة Destiny 2 في روسيا وبيلاروسيا، واللاعبين في الدول دي لسه بيمتلكوا الوصول للمحتوى اللي اشتروا ولكن أي عمليات شراء جديدة هتكون غير متاحة.

وحسب موقع The Verge، فشركة مايكروسوفت وقفت كل عمليات المبيعات للمنتجات والخدمات بتاعتها في روسيا.

الموضوع خلص لحد هنا؟ لا، شركة Nintendo هي كمان وضعت متجرها الإلكتروني في روسيا في وضع الصيانة.

طبعا كان في شركات عملاقة في عالم صناعة الألعاب زي Epic Games و CD Projekt Red و Ubisoft و Take-Two اللي سبقوا شركة سوني ومايكروسوفت في خطوات زي دي، ولكن هل الموضوع انتهى لحد هنا؟ لا برضه.

شركة Intel و شركة AMD وقفوا برضه عمليات بيع منتجاتهم في روسيا، وده مش هيأثر بس على اللاعبين الروس ولكن هيأثر على سوق الهاردوير في روسيا كلها.

واستكمالا للكلام عن قرارات شركة EA بخصوص الحرب الروسية الأوكرانية، الشركة ماكتفتش بحذف المنتخبات والفرق الروسية، ولكن قررت وقف بيع كل ألعابها في روسيا وبيلاروسيا.. الموضوع يقف لحد هنا؟ أه المرة دي كده خلصنا بس هنكمل كلام عن شركة EA

في تقارير بتقول إن الشركة بدأت مفاوضات مع إتحاد WWE عشان تحصل على حقوق تقديم ألعاب المصارعة بدل من شركة 2K اللي كان في بينهم وبين الـWWE من 2016 والمفروض إنه كان يخلص السنة دي.. إيه رأيكم لو ده حصل هل هيكون في صالح اللعبة واللاعبين ولا لا؟

حسب موقع IGN في نسخته العربية، فلعبة Apex Legends Mobile هيتم إطلاقها خلال الفترة الجاية في عدة دول زي الفلبين وسنغافورة وكولومبيا وأستراليا ونيوزيلندا والمكسيك وبيرو وإندونيسيا وده بيجي في إطار اختبار اللعبة قبل ما يتم إطلاقها بشكل نهائي ورسمي.. هل اللعبة هتكون منافس لـ PUBG و Call of Duty Mobile؟ قولولنا رأيكم برضه.