شركة أبل حصلت على براءة اختراع “iPhone” قابل للطي
أغلب جيلنا وهو صغير كان بيجيب الموبايلات بناءًا على الشكل بيتقفل وبيتفتح، بيطلع وبينزل وكانت دي قمة الروشنة وقتها إن يبقى معاك موبايل بيتفتح وبيتقفل، ومع دخول الأيفون والأندرويد بدأ مستوى إدراكنا للموبايلات يختلف بشكل ما ونبقى عايزين إمكانيات أكتر وبنبص على حاجات تانية في الموبايل قبل ما نجيبه بعيدًا عن الشكل وبيجي الشكل في أخر حاجة.
لكن من فترة كده شركة “Samsung” أصدرت موبايل قابل للطي وده كان خيال علمي بالنسبة لجيلنا زمان فأول ما نزل كان شئ مبهر وناس كتير انتظرت التطور ده من شركة “Apple”.. ووفقا لموقع “entrepreneur” وموقع “yahoo” وموقع “Dailymail” فشركة “أبل” أخيرًا حصلت على براءة اختراع جديدة عشان تنتج “أيفون” قابل للطي اللي كان بقالهم فترة كبيرة في إشاعات إنهم بيصمموه، بس ماكنش فيه أي خطط معلنة من الشركة عن المنتج.
والمفروض إن الأيفون الجديد أول ما هيتم إنتاجه هينافس إصدار شركة “Samsung” القابل للطي، والمفروض كمان إنه هيتغلب عليها بسبب المشاكل اللي في إصدار شركة “Samsung” وهو إن بيبقي فيه تلف في المنطقة اللي بتتني في الشاشة.
وموقع “دايلي ميل” قال إن بحسب براءة الاختراع فيه شوية حاجات هتبقى موجودة في الأيفون الجديد وهي:
1- هيكون فيه زراير جانبية على الأيفون الجديد عشان يتحكم في مستوى الصوت ودرجة سطوع الشاشة والكاميرا واختيارات تانية.
2- براءة الاختراع كمان بتشير إن الأيفون الجديد كمان هيتم فتحه بكشل رأسي عشان تبقي الشاشة بتاعته ممتدة أكتر وده مقارنة بالتصميمات التانية اللي بتتفتح بشكل أفقي وبتبقي شبه الـ Tablet
3- ووفقًا لبراءة الاختراع كمان شركة أبل بتقول إنها هتستخدم مواد أكتر مرونة في تصنيعه خصوصا في الخط اللي بيخليه الموبايل نفسه يتني وده عشان ماتقعش في نفس المشكلة اللي وقعت فيها شركة “Samsung”
وبراءة الاختراع دي جات في الوقت ده اللي بتتعرض فيه شركة “Samsung” لانتقادات مستخدمين موبايل “galaxy z fold 3” بسبب موقع طي الموبايل اللي بيأثر على كفاءة الشاشة.
وقال المحلل “David Vogt” لموقع “yahoo” إنه بالرغم من مفيش أي مؤشرات بتقول إننا هنشوف الـ iPhone القابل للطي السنة دي بس طرح المنتج نفسه في المستقبل هيساعد على زيادة مبيعات الـ ف iPhone عالميًا.
وقال كمان إن كانت انتشرت إشاعات في أبريل 2022 بتقول إن جهاز الـ iPhone القابل للطي هيكون في السوق في سنة 2025 لكن احتمال يكون ده جهاز بين الـ iPhone / iPad وقابل للطي برضه.
