شوية حاجات تقولها لنفسك الصغيرة لو قابلتها تشربوا قهوة

الأيام اللي فاتت وأنا بـ scroll down على التيك توك قابلني تريند اسمه I met my younger self for coffee.. ولقيت الناس بتحكي فيه الحاجات اللي هيقولوها لنفسهم لو قابلوها وهي صغيرة.. قعدت أفكر إيه الحاجات اللي ممكن الإنسان يقولها لنفسه لو قابلها من تاني زمان ومميزات ده!.. يمكن ده يساعدك أنت كمان تتخطى تروماتك القديمة أو حتى تبدأ رحلة التعافي!

التواصل مع طفلنا الداخلي من أول خطوات التعافي بالاعتراف بوجود مشكلة نفسية حقيقية ونوع من النضج المفروض نفتخر إننا وصلناله.. وبعد ما نعترف بوجود مشكلة بنحتاج نواجهها والمواجهة دي بتكون بالتواصل مع نفسنا بشكل مباشر عشان نقدر نتخطى صدمات الماضي.. ودي شوية حاجات ممكن نقولها لنفسنا ونحاول ننقذ لو جزء بسيط من التوشهات اللي فاتت..

-الاعتذار الحقيقي من القلب:
أول حاجة هتحتاج تقولها لنفسك أنا آسف.. أنت مديون لنفسك باعتذار كبير
على كل حاجة.. على إنك ماحبتهاش زي ما كان المفروض تحبها وعلى إنك ماتقبلتهاش.. على إنك ماستثمرتش فيها.. على إنك قللت من قدراتها وسمعت كلام الناس اللي قللوا منك واديك عرفت دلوقتي إنهم كانوا غلط!.. 

-قيمة الوقت:
عرفها إن الوقت مهم أوي في الحياة.. في العلاقات وفي التشافي وفي تطوير الذات وفي القرارات المهمة وكل حاجة حرفيًا.. وفكر نفسك إن الحاجات اللي كنت قلقان تعملها زمان عشان ممكن تاخد وقت فعلًا عدى عليها وقت كبير فالأحسن تستغله وتبدأ تطور أي حاجة ماكنتش عاجباك في شخصيتك أو في الطريقة اللي بتعيش بيها.. وبلاش تضيع وقتك في علاقات مش صح أو في اختيارات غلط لأن الوقت ده أنت أولى بيه.. والحاجات اللي مضيقاك دلوقتي مش هتفضل مضايقاك بعد كام سنة.. حتى لو مالحقتش تعرف ده زمان..
it’s okay أنت عمرك ما هتكون متأخر ولسه عندك كل الوقت في اللحظة دي “الحاضر” تعمل أي حاجة نفسك فيها.

-تقبل الاختلافات البشرية:
مهم أوي إنك تتقبل نفسك زي ماهي وطبيعة شخصيتك.. سواء كانت شخصية إجتماعية أو شخصية إنطوائية أو شخصية حساسة أو غيره أيًا كان نوع شخصيتك لازم تتقبلها لأنها هي اللي في الآخر هتميزك عن غيرك وعلى رأي أحمد مكي “ماتحاولش تبقى حد تاني غير نفسك” لأن التفرد ده هو اللي هيطلع منك اختلافك في الحياة فماتشوهش نفسك بالتقليد ومحاولة إنك تبقى شبه الناس لأنك في الآخر هتكون روبوت بلا إحساس لو عملت كده.

-عادي إننا نغلط:
الإمتحان اللي كنت خايف/خايفة منه وإنت صغير عشان جبت فيه درجة وحشة مش آخر الدنيا ولا هو اللي هيحدد حياتك رايحة فين قدام.. الاختيارات الغلط هتعلمك تختار صح بعد كده.. قول لنفسك لو ماغلطناش مش هنتعلم ومش هيكون عندنا شخصية.. فماتجلدش ذاتك وتقبل الغلط وهتشكر نفسك بعدين لما تكبر.

-الإمتنان للنفس:
النفس هي اللي مكملة معانا لحد آخر لحظة فـ زي ما اتعودنا نشكر الناس على مساعداتهم حقنا على نفسنا نشكرها على إنها استحملت مننا حاجات كتيرة وصدمات وحزن وفضلت مكملة.. فقول لنفسك شكرًا.

وطبعًا الحاجات اللي فاتت دي نسبية ممكن تكون حابب تقول حاجات مختلفة لنفسك على حسب اللي جواك فتقدر تقول اللي عايزه وقتها من غير ضغوطات وتفكير كتير..

وعشان تساعد نفسك أكتر في تخطي الماضي بنفسك  وعلى التعافي خاصة لو عندك صدمات من الطفولة موقع verywell mind بيقولك شوية خطوات صغيرة  تعملها مع طفلك الداخلي ودي طبعًا ماتغنيش عن زيارة الطبيب النفسي عشان يساعدك -لو الموضوع كبير ومأثر على حياتك ومش قادر تتعامل بشكل طبيعي-..

1- إنك تعمل حوار مع طفلك الداخلي وتختارله أي عمر وتحاول تتناقش معاه وتسمع ردوده عليك كأنه حوار حقيقي جدًا ما بينكوا وأديله فرصة هو كمان يعبر ويخرج اللي جواه معاك.

2-أكتب رسالة لنفسك لو ماعرفتش تتكلم معاها وطلع فيها كل اللي جواك.

3-أبدأ قول كلمات لطيفة لنفسك كل يوم ماتستنهاش من حد.. زي إنك بتحب نفسك وبتقدرها وإنك فخور بيها ماهو أنت لو ماقدرتش نفسك مين هيقدرها؟

4-بص لصورك زمان وأنت صغير وقولها حاجات كنت محتاج تسمعها وقتها وطمنها.

5- حاول ترجع تعمل الحاجات اللي كنت بتعملها وإنت صغير وبتخليك مبسوط ومرتاح حتى لو الحاجة دي إنك تشتري لنفسك لعبة أو حاجات حلوة!.. جايز ده يخليك مرتاح نفسيًا ويساعدك تتخطى الترومات.

وبعد ما تشربوا القهوة بقى أنت ونفسك وتخرج كل اللي جواك.. خدها فرصة وبداية جديدة لكل الحاجات اللي كنت مأجلها مهما كانت بسيطة.. وأبدأ من دلوقتي وقول
”  If Not Now, Then When?”