صفقة القرن.. مصطلح حقيقي في الكورة ولا بقى مجرد شو بين الأندية والجماهير؟

لو رجعنا بالزمن عشرين سنة ورا.. هنلاقي إن كلمة “صفقة القرن” ما كانتش بتيجي غير على حدث تقيل يهز كوكب الكورة فعلًا ولما دييجو مارادونا راح نابولي والمدينة كلها اتقلبت والنادي اتحول من فريق عادي لرمز تاريخي.. ولما رونالدو لبس تيشيرت ريال مدريد وكان ده جزء من مشروع الجلاكتيكوس اللي غيّر شكل السوق والفكرة نفسها.

وقتها الصفقة كانت معناها تغيير شامل.. فني.. جماهيري.. تسويقي.. وحتى ثقافي.. وكانت بتبقى نقطة تحول حقيقية.. مش مجرد رقم كبير يتكتب في خبر عاجل.

دلوقتي؟ كل شوية نسمع نفس الكلمة.. أي لاعب نجم ينتقل حتى لو تأثيره محدود نلاقي العنوان جاهز.. “صفقة القرن”.. طب هو القرن بقى كام سنة بالظبط؟ ولا إحنا بقينا بنعيش في قرون كتير في الموسم الواحد؟

المصطلح بدأ محدود

مصطلح “Deal of the Century” ظهر في الإعلام الأوروبي بشكل محدود جدًا.. وكان بيتقال على صفقات نادرة فعلًا.. مواقع كبيرة زي BBC Sport وThe Guardian كانت بتستخدمه بحذر.. لما يحصل انتقال يقلب شكل نادي بالكامل.

لكن مع انتشار السوشيال ميديا والصحافة الرقمية.. العنوان بقى سلعة.. لازم يبقى في حاجة تجيب كليك.. ولازم الخبر يبقى متغلف بكلمة تقيلة.. فالمصطلح خرج من معناه الأصلي.. وبقى بيتقال على أي صفقة فيها اسم كبير أو رقم ضخم.. حتى لو التأثير على أرض الملعب ما كملش موسم.

فلوس كسرت السوق

لما نيمار انتقل لـ باريس سان جيرمان سنة 2017 مقابل 222 مليون يورو.. الدنيا قامت وما قعدتش.. الكل قال صفقة القرن.. لأنها كسرت الشرط الجزائي وولعت سوق الانتقالات.

بس بعد سنين.. لما نيجي نحاسب المشروع.. هنلاقي إن دوري أبطال أوروبا ما جاش.. والمشروع الفني ما استمرش بنفس القوة.. والنادي اضطر يعيد ترتيب أوراقه.. أيوه الصفقة كانت تاريخية ماليًا.. وغيرت أسعار السوق.. لكن هل غيرت مصير النادي؟ السؤال هنا هو اللي بيفضح العنوان.

 عاطفة أكبر من الحسابات

انتقال ليونيل ميسي لـ باريس سان جيرمان سنة 2021 كان زلزال إعلامي.. الجماهير اتصدمت.. والسوشيال ميديا انفجرت.. والعنوان رجع تاني.. صفقة القرن.. لكن تقارير من Financial Times وThe Athletic بعد كده اتكلمت إن الصفقة كانت تسويقية أكتر منها مشروع طويل المدى.. ميسي ما قدرش يجيب دوري الأبطال.. ومشي بعد سنتين.. والنادي بدأ مرحلة جديدة بفلسفة مختلفة.. الضجة كانت أعلى من الأثر.

صفقة حلوة من غير ما نزوّدها

هالاند لما راح مانشستر سيتي.. ناس كتير حاولت تقول صفقة القرن.. لكن الإعلام الإنجليزي كان أهدى شوية.. الصفقة كانت ذكية.. بسعر مناسب.. وتأثير فوري.. وبطولات اتحققت فعلًا.. وهالاند زوّد قوة مشروع قائم أصلًا.. لكنه ما غيرش هوية النادي من الصفر.. وده يمكن الفرق بين صفقة عظيمة وصفقة قرن حقيقية.

اسم كسب.. ومشروع تعب

انتقال كريستيانو رونالدو لـ يوفنتوس سنة 2018 اتوصف بنفس اللقب الكبير.. العوائد التسويقية كانت ضخمة.. التيشيرتات اتباعت.. والاهتمام العالمي زاد.

لكن على أرض الملعب.. دوري الأبطال ما جاش.. والنادي دخل في ضغوط مالية.. وبعد رحيله احتاج يعيد هيكلته.. تاني مرة نكتشف إن الاسم الكبير مش دايمًا معناه تغيير تاريخي طويل المدى.

العنوان أهم من المضمون

عندنا في المنطقة.. الموضوع أخد منحنى تاني خالص.. أي صفقة بين الأهلي والزمالك بقت جاهزة تتحط تحت لافتة صفقة القرن.. سواء انتقال إمام عاشور أو عبدالله السعيد.. العنوان لازم يبقى تقيل.

نفس الحكاية حصلت زمان مع حسام حسن في تنقلاته بين القطبين.. التركيز كان على الصدمة والجدل.. مش دايمًا على التأثير الفني الحقيقي.. العنوان بقى وسيلة لإشعال المدرجات قبل ما يكون توصيف موضوعي للحدث.

هل هنا نقرب من المعنى الحقيقي؟

لما كريستيانو رونالدو راح نادي النصر.. الصورة كانت مختلفة شوية.. الصفقة غيرت شكل الدوري السعودي عالميًا.. جذبت نجوم.. وفتحت سوق جديد.. ومن زاوية تأثيرها على دوري كامل مش بس نادي.. ممكن نقول إنها أقرب لفكرة صفقة القرن.. لكنها تفضل حالة نادرة.. مش قاعدة تتكرر كل صيف.

طب إيه هو المقياس الصح؟

لو هنتكلم بعقل.. صفقة القرن لازم تحقق شوية شروط واضحة.. تغيّر شكل نادي أو دوري لسنين قدام.. يكون تأثيرها الفني حقيقي مش مجرد هاشتاج.. تستمر وتخلق واقع جديد.. وما تبقاش مجرد رد فعل مؤقت.. ولو الشروط دي ما اكتملتش.. تبقى صفقة كبيرة.. آه.. تاريخية.. ممكن.. لكن مش صفقة قرن.

في النهاية.. المصطلح جذاب وبيبيع.. وبيعمل ترند سريع.. بس كل ما الكلمة تتقال بسهولة.. قيمتها بتقل.. مش كل لاعب نجم يبقى صفقة القرن.. ومش كل رقم ضخم يبقى لحظة تاريخية.. والحقيقة إن صفقة القرن نادرة جدًا.. ولو حصلت فعلًا.. مش هتحتاج عنوان يصرخ بيها.. إحنا اللي محتاجين نفوق شوية.. ونسأل نفسنا قبل ما نصدق.. هو فعلًا القرن جه؟ ولا إحنا بس بنحب العناوين الكبيرة؟