صلاح هيروح فين لو مشي من ليفربول السعودية ولا أمريكا وأوروبا؟

الملك المصري محمد صلاح المحترف في ليفربول الإنجليزي شكله كده وصل لطريق مسدود مع مدربه الهولندي سلوت وليفربول بشكل عام.. وده بعد 8 سنين لعب فيها صلاح مع الريدز لكن بعد اللي حصل من كام يوم بينهم “تصريحات واستبعاد” وارد نشوف صلاح في نادي تاني يناير الجاي..رغم أن هيكون فات بس 6 شهور على تجديد عقده اللي مدته سنتين

من كام يوم محمد صلاح خرج بتصريحات نارية ضد إدارة ليفربول ومدربه الهولندي أرني سلوت بعد ما قعد دكة لـ٣ مباريات على التوالي ودي لأول مرة تحصل لصلاح مع الفريق منذ انضمامه في صيف ٢٠١٧ وقال أن في حد في النادي مش حابب وجوده

وبناءً على تصريحاته دي.. النادي خد موقف وقرر إبعاد صلاح عن قائمة الفريق في لقاء إنترميلان اللي كسبوا 1-0 بدوري أبطال أوروبا ولفترة قصيرة حسب كلام سلوت

لكن السؤال دلوقتي.. إيه هي خطوة صلاح الجاية.. ولو مشي هيروح فين؟ 

فجمعنالكم شوية اختيارات من التقارير والأخبار المنتشرة في الأيام الأخيرة

في البداية ما زال طبعًا الدوري السعودي مهتم بوجود صلاح.. وصحيفة “الرياضية” بتقول لو صلاح موصلش لحل مع ليفربول وسلوت هيكون قريب من اللعب في السعودية.. وهنا بقى عندك أندية كتيرة على رأسهم طبعًا فريق الهلال أو الاتحاد أو ربما نشوفه في فريق القادسية ودول الفرق التلاتة الأبرز لضم صلاح في السعودية 

لكن خلينا برضه نتفق أن وارد محمد صلاح يكمل في أوروبا على الأقل سنة كمان.. وده لأن فيه تقارير بتقول فيه اهتمام بصلاح من جلطة سراي التركي أو يرجع روما تاني لأنهم كانوا بيلمحوا من فترة على السوشيال ميديا

وقبل ما نقفل الكلام.. نحب نقول أن فيه اهتمام برضه أمريكي بصلاح من فريق سان دييجو وربما يلازم ليونيل ميسي في فريق إنتر ميامي وكمان فريق شيكاغو داخل في السكة.. والتلاتة عايزين صلاح في يناير الجاي

السيناريوهات كلها هتفضل معلقة الأيام دي.. وهنسمع كلام كتير هنا وهناك خصوصًا أن صلاح لسة معاه وقت وهيشارك مع منتخب مصر في كأس الأمم الأفريقية.. وكمان العالم الرياضي كله مستني رد الفعل من سلوت وصلاح.. هل حد فيهم هيعتذر والدنيا تصفى بينهم.. ولا صلاح هيقرر يمشي في أقرب وقت ؟