عشان مايتضحكش عليك.. دليل مبسط لفهم أنواع العطور

حاسة الشم محدش يقدر يستغنى عنها.. واللي جاله كورونا وقعد شوية مابيشمش عارف ده كويس.. أصل مفيش أحلى من إنك تشم شوية روايح حلوة كده.. الريحة الحلوة أصلًا ممكن تغير مودك للأحسن.

من هنا بقى نروح للروايح الحلوة.. البرفيومز أو البرفان أو زي ما بتحب تقولها.

ساعات كده وانت بتشتري بتلاقي أسامي مختلفة.. مش اسم البرفيوم نفسه.. بس أنواع مختلفة.. فحبينا نوضح الفرق بين كل نوع من أنواع العطور.

1- العطر (Parfum)

ده بيكون أعلى تركيز من الزيوت العطرية ونسبة التركيز بتكون من ٢٠٪ لـ ٤٠٪ وثباتها بيفضل من ٨ لـ ١٢ ساعة ودي بينصح باستخدامها في المناسبات أو لو يومك طويل وعايز ريحة تفضل ثابتة معاك.

2- ماء العطر (Eau de Parfum)

تركيزها بيكون من ١٥٪ لـ ٢٠٪ وثباتها بيكون لمدة من ٨ لـ ١٢ ساعة وبتتميز بريحتها القوية بس مش تقيلة زي “العطر” وأحسن استخدام ليها بيكون في الحاجات اليومية والخروجات مثلًا.

3- ماء التواليت (Eau de Toilette)

تركيزه بيكون من من ٥٪ لـ ١٥٪ وبيفضل ثابت لمدة من ٤ لـ ٦ ساعات وبيتميز بإنه خفيف ومنعش وممكن تستخدمه في أيام الشتاء لأنه بيكون خفيف وممكن كمان تستخدمه وانت في الشغل.

4- الكولونيا (Eau de Cologne)

مش كولونيا خمس خمسات لأ.. ده برضه نوع من أنواع العطور.. تركيز الكولونيا بيكون أقل حاجة.. من ٢٪ لـ ٥٪ وثباتها بيفضل من ساعتين لـ ٤ ساعات وبتتميز بريحة خفيفة ومنعشة ودي ممكن تخليها معاك تدي رشة كده كل شوية.

بعد ما عرفت الفرق.. قولنا بقى بتاخد بالك من الكلام ده ولا ما بتعتمدش أسامي؟