عن مصطلح “الفيل في الغرفة” وإزاي نتعامل مع مشاكلنا!
ساعات بيحصل حوالينا مشاكل وبنعمل مش واخدين بالنا أو بنقرر نتجاهلها رغم إنها واضحة وضوح الشمس عشان بس مش عايزين حوارات وعايزين نريح نفسنا.. أهو ده بالظبط المقصود بمصطلح elephant in the room أو “الفيل في الغرفة” وهو مصطلح إنجليزي المقصود بيه وصف مشكلة كبيرة أو خطر لكن مافيش أي شخص راضي يتكلم عنه وبيتجاهله فتعالوا نعرف أصل المصطلح ده وفقًا لموقع encyclopedia
القصة بدأت سنة 1814م في سنة 1814م لما كتب الشاعر وكاتب القصص الخيالية “إيفان أندريفيتش كريلوف” قصة خيالية اسمها “الرجل الفضولي” وكان بيحكي فيها عن راجل بيروح كل يوم المتحف وبيشوف كل التفاصيل وكل الحاجات الصغيرة ماعدا الفيل.. ومن بعدها الجملة بقت مثل واستخدمها ناس كتير زي “دوستويفسكي” اللي استخدمها في رواية”الشياطين” وكان بيقول فيها إن شخصية بيلينسكي زي الرجل الفضولي اللي ماخدش باله من الفيل في المتحف.
والمصطلح بقى ليه إستخدامات كتير من ضمنها:
المشاكل اللي بيتم تجاهلها بشكل متعمد عشان مايحصلش إحراج لحد أو المشكلة تكبر أكتر فبتتحول لمشكلة ماينفعش نتكلم عنها.. وده بيحصل كتير بين العائلات لما الفجوات بتكبر بينهم بسبب قلة التواصل فبيتحول مشاكلهم للفيل في الغرفة ويعملوا إنهم مش شايفينها على أمل إنها تتحل لوحدها.. وكمان في الشغل لما بتحصل مشكلة وبنعمل مش شايفينها عشان ماندخلش في حوارات.. وفي الشارع لما يكون في مشكلة كبيرة أو خناقة ونقرر نتجاهلها.. بس المصطلح عايز يقولنا إن مافيش حاجة هتتحل لوحدها ولازم نحلها بنفسنا !
طيب إزاي نحل المشكلة بطريقة صح بدل ما نتجاهلها؟.. وفقا لموقع davidlivermore
دي شوية نصايح تساعدك تتعامل مع المشاكل اللي بتتجاهلها:
1- أتأكد من إن في فيل فعلا في الغرفة:
محتاج تهدا وتركز كده وتتأكد الأول إن فعلا في مشكلة كبيرة دايرة.. ولازم تتأكد إن الموضوع مش مجرد اختلاف تفكير أو وجهات نظر مع الحاجات اللي حواليك.. وإن حتى لو فيه مشكلة (الفيل) السكوت عنها فعلا لتجاهلها عشان يكون فعلا المصطلح ينطبق عليها.. عشان ممكن بس الناس تكون ساكتة عشان واخدة وقت تفكر فيه في حلول للمشكلة..أو أصلا الشخص ساكت عشان عنده مشاكل تانية بيفكر فيها. .وأتأكد كمان إن في ناس تانية عندها نفس التصور عن المشكلة مش أنت لوحدك بس عشان ماتبقاش بتعمل مشكلة عالفاضي.. وإذا طلع فعلا في مشكلة ساعتها يبقى في حد يساعدك في حلها لإنه عنده نفس رأيك عنها.
2-سمي المشكلة واعرفها كويس بس خليك واخد بالك:
يعني اعرف المشكلة وعبر عنها بذكاء من غير ما تعمل مشكلة أكبر بردود أفعالك أو تأذي الشخص بكلامك من غير ماتاخد بالك!
3-اعرف وجهات نظر مختلفة عن المشكلة:
بمعنى إن ساعات كل شخص بيشوف وجهة نظر أنت مش شايفها من ناحيتك.. فمعرفتك لوجهات نظر الناس التانية هتخليك تكون صورة منطقية وناضجة عن المشكلة هتساعدك في حلها والتعامل معاها.. وكمان لما حد يبدأ يعبر عن رأيه هيسهل على باقي الناس تقول رأيها من غير ماتخاف يتحكم عليها.
4-حاول تشوف الحاجات اللي أبعد من المشكلة:
زي لو في مشكلة مثلا مع أهلنا ساعات بيكون المشكلة ذات نفسها مش هي المشكلة الأصلية لكن اختلافنا مثلا هو اللي وصلنا ليها بسبب خبراتنا المختلفة.. عشان كده ساعات بيساعد إننا نتفق إننا نتعاون كلنا عشان نحل المشكلة.. وبرضه نطبق نفس الكلام لو مشكلة في الشغل أننا نشوف المصلحة المشتركة إن الشغل يطلع كويس.
خلي بالك بقى لو قريت الموضوع ده وطلع عندك فيل في الغرفة.. حاول تمشيه بشياكة ومتتجاهلش الكلام عشان الفيل مايتعبكش بعدين!
