في اليوم العالمي لـ مافيش دايت.. اعرف 5 فوايد إنك ماتعملوش
ساعات كتير بنعمل دايت وبنمشي عليه كويس.. لكن مابنلاقيش النتايج اللي كنا منتظرينها فبنحس بإحباط شديد وده بيخلينا مانستمرش لفترات طويلة وبما إن النهاردة يوم 6 مايو اليوم العالمي لـ NO Diet عشان كده في الموضوع ده هنقولك فوايد إنك ماتعملش دايت! وفقا لموقع jodiearnot
مستشارة الأكل وإخصائية التغذية “نينا ميلز” بتقول إن دايما بنلاقي مقالات كتير وكتابات بتشجع إننا نعمل دايت ولكن ده مش بيكون دايمًا طويل المدى وبيكون فترة محددة.. لكن في حاجات تانية لو ركزنا عليها هتكون أحسن من إننا نعمل نظام غذائي قاسي لفترة ونسيبه..
ومن ضمن فوايد إننا مانعملش دايت:
1- هتحسن طاقتك وصحتك النفسية:
لما تبطل هوسك بالدايت وتركيز على كميات الأقل و تأنب ضميرك على كل حاجة هتاكلها وتفضل تحسب السعرات الحرارية.. ده هيقلل من التوتر والضغط وهتلاقي نفسك بقيت أهدا نفسيًا كتير وممكن توفر الوقت ده تعمل حاجات مهمة وهوايات تخليك تقلل تركيزك على الأكل وتريحك نفسيًا.
2-هتغير فكرتك عن نفسك:
هتحب نفسك زي ما أنت وتبعد عن التصور المثالي للجسم والوزن اللي بتحاول ترسخه جواك من اللي حواليك.. لأن ببساطة مفيش وزن مثالي.. كل شخص له شكله ووزنه وطوله اللي يليق معاه والوزن الوحيد اللي ممكن تفكر فيه هو الوزن الصحي إنك تكون فعلا صحي وخالي من الأمراض.
3-هتبطل تصعب فكرة الأكل:
لو أنت خارج ومش معاك أكل أو في الشغل وجعان هتقدر تطلب أكل مناسب ليك تاكله بدل ما كنت بتجوع نفسك اليوم كله بحجة إنك مش لاقي أكل يناسب الدايت وبالتالي بتدوخ وتتعب باقي اليوم.
4-الرياضة هتكون بالنسبة لك شيء ممتع:
لما نبطل نفرض على نفسنا الجيم ونربطه بالدايت أو نجلد ذاتنا إنها لازم تنزل تتمشى 5000 كيلو عشان نخس.. وقتها الرياضة هتكون بالنسبة لنا شيء ممتع ورفاهية بنعملها عشان نحسن صحتنا النفسية والجسدية.
5-هتوفر فلوس كتير أوي:
بعد ما كنت بتصرف فلوس كتير على الدايت والدكاترة وأنواع معينة من الأكل ممكن تكون بتطلبها عشان تساعدك في نظامك.. هتلاقي نفسك اتحررت من كل ده وجايز يكون ده مشجع ليك إنك تبدأ بداية جديدة وتشجع نفسك تعمل كل الحاجات دي واحدة واحدة وتتعلم تساعد نفسك بنفسك..
وفي الأخر الكلام ده مش معناه خالص إنك تهمل نفسك وصحتك لو حاسس إنك محتاج تهتم بيها بالعكس المفروض تفضل تشتغل على نفسك وتحسن من صحتك ولكن من غير ما تضغط على نفسك بشكل مؤذي ليك ولصحتك.
