في اليوم العالمي للخط.. بعض أنواع الخط العربي وتاريخهم

الخط العربي بسبب مرونة الحروف وسلاستها بيديله مساحة كبيرة للتنوع في الشكل وكمان أسباب التنوع اختلاف الأقلام اللي بتتكتب بيه وده عمل فرصة للمبدعين في ابتكار أشكال جديدة للحروف العربية وإنهم يعملوا خطوط جديدة.. وعندنا في الخط العربي أنواع للخطوط فا تعالوا نتعرف عليها وعلى تاريخ نشأتها.

أنواع الخط العربي وتاريخها:

حسب الأمم المتحدة وموقع فن الخط العربي

1- الخط الكوفي

من أقدم الخطوط العربية ومستوحى من “الخط النبطي” اللي بيرجع للكتابة الآرمية والخط الكوفي ظهر في الكوفة بالعراق ومنها لباقي المدن والبلدان العربية وشكله بيتميز بالاستقامة وكانوا بيستخدموا مسطرة زمان عشان يكتبوه وماحدش كان بيعرفه غير الخطاطين 

2- النسخ

وده من أسهل الخطوط العربية بس أهميته كبيرة لأن استخدامه تقريبًا بشكل يومي في كل حاجة بسبب إنه واضح وبسيط وسهل وبيتم استخدامه في المصاحف والكتب.. بالنسبة لتاريخه بيعود غالبًا لإن خطاط شهير اسمه “ابن مقلة” اشتقه من خطوط أخرى وعمل شوية تعديلات كتير عليه عشان يطلع بشكل محدد واللي ثبته على الوضع اللي هو فيه دلوقتي الخطاط “ابن البواب” واللي يعتبر من عباقرة الخط العربي 

3- الرقعة

أيام السلطان سليمان القانوني كان في شوية خطاطين كده تأثيرهم كان تقيل في الخط نتيجته موجودة لحد دلوقتي وكان منهم الخطاط “محمد عزت وعبد الحميد الأول وممتاز بك وهاشم البغدادي” واللي كانوا في عهد الدولة العثمانية وبيعتبر برضه من الخطوط البسيطة ومافيش زخارف كتير.. وبعض الخطاطين قالوا إن سر إنك تتعلم الخط ده هو إنك تتقن 4 حروف وهم “النون والعين والباء والألف”

4- الديواني

العهد العثماني كان مميز بشوية خطوط منها الخط الديواني اللي كانت بتتكتب بيه الوثائق أيام العثمانيين وأوامر تعيين الناس في الدولة وده بقى من أصعب الخطوط لأنه بياخد وقت كبير عشان تتقنه وبيتميز بإنه فيه انحناءات وزخارف ومؤسسه كان فنان اسمه “شهلا باشا” وكان فيه خطاطين تانيين مميزين بالخط زي مصطفى غزلان بك

5- الثُلث

من أشهر الخطوط اللي بيتم استخدامها في تزيين المساجد والقبة بتاعتهم وكتابة العناوين الرئيسية للكتب وبرضه من الخطوط الصعبة سواء إنك تتعلمه أو تكتبه.. بيرجع تسميته إنه بيتكتب بقصبة كده راسها مثلثة وشكله بيختلف حسب استخدام القصبة بتاع الكتابة واللي حط الأسس بتاعته برضه كان “ابن مقلة” وبيعود نشأته للقرن الثالث الهجري تقريبًا

6- المغربي

بسبب تأثير الأندلس في شمال أفريقيا كان فيه خط متأثرين بيه في شمال أفريقيا خصوصًا المغرب.. لكن بعد اختفاء الأندلس بدأ المغاربة يضيفوا عليه ويجودوا فيه فا ظهر الخط “المغربي” اللي كمان كان اتأثر شوية بالخط الكوفي خصوصًا في بعض الحروف زي “الكاف والصاد والضاد والطاء والظاء” بتكون ممتدة بشكل شبه رسمها وكتابتها في الخط الكوفي.

7- الحر

الخط الحر هو خط مستحدث مالوش قواعد خالص لكن كل خطاط بيكتبه حسب رؤيته ومهارته.. بيجمع بين كل الخطوط العربية  وتطلع شكل حلو ومقبول ولازم يراعي كمان أسس الخطوط كلها بشكل عام عشان يبقى مظبوط

في النهاية الخطوط العربية كتير وفيه أنواع مختلفة أوي عن بعض وده على مر العصور بسبب استخدامهم والتأثر بكل نوع فيهم في التاني أو الخطوط اللي مش عربية لما تأثر عليها.. لكن في الأخر ماحدش يقدر يختلف على جمال وتنوع وقوة الخطوط العربية.