في اليوم العالمي للراديو.. 8 أسباب بتحببنا في الإذاعات مهما التكنولوجيا اتطورت
فيه مؤسسة اسمها “Edison Research” عملت دراسة لقت فيها إن في أسباب كتيرة ورا حب الناس للراديو، بس السبب الأساسي هو حبهم لسماع الراديو هي إنه مصدر للأخبار العالمية والمحلية والأغاني ده غير إنهم بيحسوا إن فيه حد بيتكلم معاهم.
الراديو استمر في تطوره من أول ما طلع مع تطور التكنولوجيا والأجهزة، وده بسبب حنين الناس له أو إحساسهم إنه شيء أساسي مش ممكن يستغنوا عنه، الراديو في أول ظهوره كان عبارة عن جهاز مستقل بذاته وكانت قنواته قليلة وبالرغم من كده إلا إنه كان غالي عشان هو وسيلة توصيل الأخبار والترفيه الوحيدة اللي كانت موجودة.
بعد كده مع ظهور جهاز الكاسيت بقى جوه الكاسيت راديو وبقى ممكن تحط شريط وممكن تفصل الشريط وتسمع الراديو، ومع الوقت والتطور وظهور “الدش” أو الأقمار الصناعية بقى ممكن تفصل القنوات اللي بتتفرج عليها وتسمع راديو بس، ومن وقت ظهور الموبايل برضه كان ممكن تسمع الراديو على الموبايل بس كل اللي عليك تحط سماعات، ومع دخول الإنترنت بقى فيه محطات راديو أون لاين، وبقى فيه محطات راديو في التلفزيون كمان، حتى مع تطور عصر الإنترنت بقت المحطات تصور مذيعينها وينزلوا الفيديوهات على اليوتيوب وتحصد مشاهدات كتير.
وبمناسبة إن 13 فبراير هو اليوم العالمي للراديو، قررنا نحتفل بالجهاز أو التقنية اللي لسه صامدة بالرغم من كل التطور والتكنولوجيا اللي ظهرت بعدها، ومش صامدة بس في وجودها هي صامدة كمان في حب الناس ليها من أول مرة سمعوا فيها الناس الإذاعة المصرية كان صوت أحمد سالم أول مذيع للإذاعة المصرية يوم الخميس ٣١ مايو ١٩٣٤ وهو بيقول “ألو.. ألو.. هنا الإذاعة اللاسلكية للحكومة المصرية”، وبعدها قرأ الشيخ محمد رفعت قرآن بصوته وبعد ما طلع المذيع أحمد سالم فاصل رجعت غنت أم كلثوم.
فلو شايف إن حب الناس للراديو لحد دلوقتي شئ غير مبرر مقارنة بالتلفزيون والإنترنت، تعالى نقولك ليه هو شيء منطقي:
1- المزيكا
كل الناس بتحب المزيكا والأغاني، ودي واحدة من أهم الأسباب اللي بتخلي الناس تحب الراديو وبالرغم من التطور اللي حاصل دلوقتي إنك تقدر تجيب الأغنية اللي عايز تسمعها من أي أبلكيشن إلا إن الراديو بيختار للناس الأغاني اللي بيسمعوها، مش هما اللي بيختاروا بنفسهم وده أريح، غير إنه بيخليهم يكتشفوا أغاني جديدة أو نوع جديد ماكنوش بيسمعوه غير لو اتذاع قدامهم بالصدفة.
2- التسلية
الراديو هو أحسن وسيلة ممكن تسليك في العربية أو في المواصلات اليومية، باختلاف أنواع المحطات اللي ممكن تسمعها، لإن فيه حد ممكن يتكلم معاك في موضوع ويرجع يسمعك أغاني ويرجع يبقى فيه نشرة، فتقدر تسمع أغاني وتلعب وتعرف الأخبار في نفس الوقت.
3- سهل
كل سنة أبلكيشنز محطات الراديو على الموبايل بتبقى أسهل وأسرع، وده بيبقى أقل تحميل على بطارية الموبايل من إنك تحمل الأغاني على موبايلك وتاخد مساحة كبيرة.
4- الخيال
برامج الراديو أو المسلسلات الإذاعية أو أي مادة فيها استخدام لصوت شخص بتوسع خيال المستمع لإنه بيبدأ يتخيل شكل الشخص، وطريقته وهو بيتكلم، ولبسه، وأسلوبه عامل إزاي، وبتحسسك إن عندك صاحب بيتكلم معاك أو بيسليك، ده غير إن المسلسلات الإذاعية كمان بتخليك تعيش الأحداث وتتخيل الحدث كمان.
5- وسيلة إعلام
من أهم المميزات في الراديو من وقت ظهوره هو إنه وسيلة إعلام، فممكن من خلال برامج نشرات الأخبار تعرف الأخبار من أي مكان سواء كانت أخبار سياسية أو ماتش كرة كامل أو حالة الجو عاملة إزاي، وده سبب كبير بيخلي الناس تبقى مشغله الراديو أغلب الوقت في الطرق والمواصلات.
6- المحتوى الخدمي
تطور برامج الراديو واندماج الناس مع الإنترنت خلى البرامج اللي في الراديو ساعة وقت الذروة تبقى بتتكلم عن النشرات المرورية، وده بيسهل على الناس تعرف طريقها عامل إزاي ويبعدوا عن أماكن إيه.
7- صوت الذكريات
فيه قنوات في الراديو زي إذاعة الأغاني وإذاعة الشباب والرياضة وإذاعة القرآن الكريم هما أساس بيوت مصرية كتير من زمان ولحد دلوقتي، عشان كده صوت الإذاعات دي بيخليك تحس إنك متطمن لما تسمعها أو تحس إنك بتحن للماضي لإن الإذاعات ماتطورتش كتير ومرتبطة بطفولتك.
8- تفاعلي
بعض البرامج بتبقى عاملة مسابقات وفيها جوايز زي تذكرة لحفلة مثلا أو حاجة بتكون مقدمة من الراعي الرسمي للبرنامج، وفيه ناس بتحب تسمع الراديو وتشارك عشان تكسب جوايز وناس بتحب تشارك عشان اسمها يتقال على الراديو.
الراديو وسيلة دايما موجودة عشان الشخص يهرب من الضغوطات اللي عنده ويبقى عنده وعي باللي حواليه من أخبار وأحداث، يمكن التطورات اللي فيه تبقى مش آخر تطورات هنشوفها لإنه الناس مرتبطة به ومعاهم في كتير من أحداث حياتهم، فخلينا نشوف هيوصل لفين بعد كده.
