في اليوم العالمي للصحة النفسية.. أماكن بتقدم العلاج النفسي مجانا
يوم 10 أكتوبر من كل سنة بيكون اليوم العالمي للصحة النفسية Mental Health.. ومع ارتفاع أسعار كل حاجة في حياتنا، وبالذات كمان خدمات العلاج النفسي والصحة النفسية، ناس كتير مبيبقاش عندهم القدرة على تحمل مصاريف الدكتور النفسي، وعشان كده بنقدملكم مجموعة من المستشفيات والعيادات والمواقع اللي بتقدم خدمات العلاج النفسي بشكل مجاني أو بأسعار رمزية.
- منصة وزارة الصحة لخدمات الصحة النفسية وعلاج الإدمان
المنصة بتساهم في الحصول على الاستشارات والدعم النفسي في خصوصية وسرية تامة والتغلب على الوصم المتعلق بالاضطرابات النفسية في المجتمع.
لينك المنصة: https://nmhp.mohp.gov.eg/mental/web/ar
- مستشفى العباسية للصحة النفسية
أكبر مستشفى للأمراض النفسية في مصر. المستشفى فيها أقسام نفسية وعصبية وعلاج إدمان مخدرات وإقلاع عن التدخين وصحة طفل وصحة مرأة، وغيرها من التخصصات اللي بتعتمد بشكل أساسي على العامل النفسي، والكشف في المستشفى علشان تشخيص الحالة بـ1 جنيه بس، والمواعيد بتاعتهم من 9 صباحًا حتى 12 ظهرًا يوميًا. وممكن التواصل عن طريق التليفون: 022616255 والعنوان في 1 شارع صلاح سالم بجوار أرض المعارض – مدينة نصر – القاهرة.
- مستشفى الدمرداش
مستشفى الدمرداش فيها مركز متخصص للطب النفسي والكشف فيه سعره 5 جنيه، وكمان بيصرفوا علاج مجاني وعندهم غرف حجز وتأهيل للحالات، ولكل مريض كارت متابعة بيستمر معاه طوال رحلة العلاج، ومواعيدهم من الأحد للأربعاء من 9 صباحًا حتى 2 مساءً وباقي الأيام شغالين 24 ساعة. والعنوان في شارع رمسيس بجوار مسجد النور بالعباسية.
- مستشفى مصر الجديدة للصحة النفسية
شهرتها مستشفى “المطار”، فيها قسم لتأهيل المتعافين من الإدمان مجانًا، وكمان فيها علاج بسعر رمزي في العيادات الخارجية للصحة النفسية، وفيه كمان احتجاز لو الحالة احتاجت ده، سواء مجانًا أو بأسعار خاصة للقسم الاقتصادي، ومواعيدهم يوميًا من 9 صباحًا حتى 1:30 ظهرًا، طوال أيام الأسبوع ماعدا الجمعة. وعنوانها في طريق المطار – بجوار المجمع الإداري لمصر الطيران
- طب نفسي القصر العيني
الكشف بـ 10 جنيه لأي تخصص من التخصصات، ولو الحالة محتاجة علاج بتصرفها من المستشفى مجانا، وعندهم عيادات نفسية، وإدمان، ومراهقين، وكبار سن، وأطفال، وهوية جنسية. والمواعيد من 8 صباحا ل12 ظهرا ماعدا الأحد من 8 صباحا ل10 صباحا.. وعندهم كمان طواريء طب نفسي للحالات العالجة وده موجود 24 ساعة
- العيادات النفسية التابعة للهلال الأحمر
بتكون متاحة يوم الاتنين والأربع والجلسة بتكون ب35 جنيه والعيادات موجودة في فرع زينهم ورقمهم 0223638068
أما بالنسبة للمحافظات دي مجموعة من المستشفيات الحكومية اللي بتقدم علاج نفسي بشكل مجاني:
- مستشفى بنها للصحة النفسية: في شارع كلية العلوم خلف مستشفى صدر بنها بجوار مركز تدريب مديرية الصحة بالقليوبية – بنها
- مستشفى العزازي للصحة النفسية: في قرية كفر العزازي بمركز أبوحماد – محافظة الشرقية
- مستشفى شبين الكوم للصحة النفسية: في مجمع المستشفيات بقرية ميت خلف مدينة شبين الكوم محافظة المنوفية
- مستشفى بني سويف للصحة النفسية: في كورنيش النيل- خلف مستشفى بني سويف العام
- مستشفى الخانكة للصحة النفسية: في مدينة الخانكة في القليوبية
- مستشفى حلوان للصحة النفسية: في امتداد شارع منصور- بين العزبتين -حلوان
- مستشفى بورسعيد للصحة النفسية: في امتداد شارع 23 ديسمبر، متقاطع مع شارع قناة السويس- حي الزهور.
- مستشفى أسيوط للصحة النفسية: في 4 شارع الملك فيصل، بجوار مديرية الشؤون الصحية والسكان بأسيوط ومستشفى الصدر بأسيوط
وأخيرا خليك دايما عارف إنك مش لوحدك.. وإنك مش السبب في أي حاجة سيئة أو صعبة بتتعرضلها.. وإنك تستاهل تبقى أحسن وأفضل.. لنفسك قبل ما يبقى لأي حد تاني!
