في اليوم العالمي للعطاء.. إيه الفرق بين العطاء والعبط؟
كل واحد في حياته بيتعامل بالطريقة اللي شايفها صح من وجهة نظره.. لكن السؤال المهم هنا هل إنت بتتعامل صح مع الناس اللي في حياتك في جانب العطاء والأخذ.. من الأخر بتدي للناس مجهود وحاجات في إطار متوازن وصح ولا بتتعامل بعبط؟
العطاء معناه إنك بتدي لشخص حاجة سواء في إطار معنوي أو مادي بس مش مستني مقابل.. هاه؟ مش مستني مقاااابل
في 3 أنواع الناس اللي بتاخد والناس اللي بتدي والناس اللي بتتعامل بالمثل “ميري”.. فا خلونا نوضح الفرق بين العطاء والعبط..
دول شوية حاجات بتقول إن العطاء عندك بنسبة معقولة:
مفيش مانع تبادر بالعطاء عشان تبين إن نيتك حلوة تجاه الناس فا يبتدوا يحطوك في خانة كويسه في حياتهم.. بس أوعى تخزوقهم بعدها وأوعى تكون عبيط برضه
“المعاملة بالمثل” هي Safe zone بس مش أنسب حاجة خصوصًا إن إحنا بني آدمين مش روبوتس والدنيا مش دايمًا أبيض وأسود.. في رمادي وساعات أسود ومنيل بستين نيلة بس الحالة دي أمان ومش هيتمسك عليك غلطة فيها لو عملتها بشياكة
في الشغل مثلا.. فيه ناس بتاخد بس وناس بتدي وناس بتتعامل بالمثل وهنا هتلاقي اللي بياخد بس الناس بتكتشفه وتبطل تساعده بعد كده ونجاحه هيكون قليل عشان ماحدش هيعبره بعدين.. سواء المانحين أو اللي بيتعاملوا بالمثل.. أما النوعين التانيين الناس بتحبهم ونيتهم بتظهر إنها السليمة وبالتالي نجاحهم هيكون على المدى البعيد وفيه استمرارية مش زي الأنانيين اللي بياخدوا بس
ودول شوية حاجات بتقول إن ده مش عطاء ده عبط:
1- أول نقطة بتبين إن اللي بتعمله عبط هي إنك تضيع وقتك ومجهود كله على الناس التانية وتنسى نفسك.. ده عبط بيور
2- تاني حاجة إنك تساعد وتتكسف تطلب مساعدة.. لازم تطلب مساعدة بس من غير بجاحة برضه
3- التالتة هي إنك تشك في شخص إنه أناني وبتاع مصلحته وتفضل مكمل في العطاء.. اصحى ليغفلونا
في الأخر خصص وقت للعطاء واستثمر نتيجته.. يعني تخلي وقت صغير في يومك أو أسبوعك تقدم فيه خدمة للناس سواء عمل خيري أو مساعدة للناس في دايرتك.. التقسيم فايدته في إنك هتحس كل مرة تساعد فيها إنك كويس وهيحفزك باستمرار سواء في حياتك أو في إنك تكمل عطاء.. كمان راقب الناس اللي بتاخد بس.. أكيد فيه عبيط قبلك وقع في الغلطة دي فا ميزة المراقبة هي اكتشاف الشخص من الأول بدل ما تتخدع فيه وتعيش برنامج “الثدمة”
أما بقى لو عطلت خالص ومش قادر تحدد أكون معطاء ولا آخذ حط نفسك في الخانة الأمان وساعد الناس بنفس القدر اللي بيساعدوك بيه.. بس حاول تعملها بصياعه
