في اليوم العالمي للقطن.. ليه القطن المصري عالمي؟
أكيد سمعت في وقت من الأوقات عن القطن المصري طويل التيلة وقد إيه القطن ده انتشر واتطلب في كل أنحاء العالم.. بس سألت نفسك قبل إيه سبب الشهرة دي وليه القطن المصري مميز؟
في دراسة اتنشرت على موقع “EJFOOD” واتعملت على أنواع من القطن المصري الباحثة “إيمان يحيى” قالت إن اللي بيميز القطن المصري مجموعة من العوامل:
1- قوة خيوطه وتماسكها: القطن المصري وخاصة نوع اسمه “Giza 92” بيكون خيوط قوية ومتماسكة نتيجة لطولها وتداخلها مع بعض.. القوة دي بتساعد إنها ماتتقطعش بسهولة أثناء عملية النسيج أو الاستخدام
2- مرونة خيوطه: القطن المصري رغم قوته وتداخله مع بعض.. إلا إنه مرن ومش سميك.. فده بيدي راحة ونعومة أكتر في اللبس ومتانة أعلى في الغسيل
3- تجانس خيوطه: القطن المصري خاصة نوع “Giza 92” بيتميز إن خيوطه كلها شبه بعض.. مفيش حتة أكبر أو متكتلة أكتر من حتة تانية.. وده بيخلي شكله أنعم وأجمل في اللبس ومايظهرش أي تكتلات في النسيج
4- الزغب أو الشعر: ده بيكون شعر صغير وزيادة كده في النسيج بيخلي ملمسه خشن شوية.. في القطن المصري نسبة الزغب مش بتعدي الـ”2″ درجة خاصة في نوع “Giza 92”.. وده بيخلي سطح النسيج نفسه أنعم مش مشعر أو خشن
5- طول الألياف: بيتميز القطن المصري بألياف بيوصل طولها “35.7 مم” وده أطول من متوسط الطول العالمي بحوالي “40%”.. وده بيوصل للتشابك والنعومة اللي بتكون أقرب للحرير
كل دي أسباب ساهم إنها تحصل توافر عوامل كتير في زراعة القطن في مصر ممكن ماتكونش موجودة في أماكن تانية في العالم زي:
1- نهر النيل: اللي بيوفر المياه باستمرار وبكثافة لري الأراضي المزروعة.. وتوافر المياه بالشكل ده هو اللي بيساعد في نمو الألياف الطويلة للقطن
2- المناخ: جو مصر المستقر في الحرارة في شهر يوليو وأغسطس بيعتبر طقس مثالي لنضج ونمو القطن طويل التيلة ويخليه جاهز للحصاد في سبتمبر وأكتوبر
3- طريقة الحصاد: في مصر حصاد القطن لسه بيتم بشكل يدوي.. وعلى عكس ما ممكن تتخيل إن الحصاد الآلي أسرع وأفضل بس في حالتنا هنا إحنا تفوقنا.. لإن المزارعين وهما بيحصدوا بشكل يدوي بيقدروا يقطفوا القطن من غير الأغصان اللي ممكن تخليه أخشن.. وده صعب يحصل في الحصاد الآلي
كل المميزات دي خلت القطن المصري واحد من أكتر أنواع القطن المطلوبة في العالم.. وحسب تصريح “عبير سمير” نائبة مدير معهد بحوث القطن بمركز البحوث الزراعية، لموقع “آراب فاينانس” القطن المصري طويل التيلة بيمثل “30%” من الإنتاج العالمي.. وحققت مصر من صادرات القطن حوالي “103.716” مليون دولار سنة 2023
وده برضه اللي مخلي الهند وباكستان والصين وتركيا وإيطاليا هما أكبر مستوردين القطن المصري بحوالي “35.9” ألف طن.. وبيستخدموه في مختلف أنواع النسيج.. من أول اللبس الفاخر لحد المفروشات.
