في اليوم العالمي لمرض السُّل.. جمعنالكم معلومات عنه

النهاردة يوم 24 مارس وهو اليوم العالمي السُّل وبيتزامن التاريخ مع اليوم نفسه اللي أعلن فيه دكتور “روبرت كوخ” اكتشافه البكتيريا المسببة للسل سنة 1882م ومن وقتها ده ساعد في تشخيص المرض وعلاجه في العالم كله..
واليوم هدفه التوعية بوباء السل العالمي اللي بيسبب آثار صحية واجتماعية واقتصادية مدمّرة في العالم كله.. عشان كده جمعنالكوا في الموضوع ده معلومات مهمة عنه وفقا للموقع الرسمي لمنظمة الصحة العالمية

مرض السل:
هو مرض معدي بيصيب الرئتين بسبب نوع من البكتيريا في الأغلب.. وبينتقل عن طريق الهواء من خلال السعال أو العطس أو البصق

أعراضه:
المصابون بعدوى السل مابيحسوش بالمرض وغير ناقلين للعدوى.
واللي بيصاب بمرض السل وأعراضه نسبة صغيرة من الأشخاص المصابين بالعدوة البكتيرية والرضع والأطفال  بيكونوا أكتر عرضة للخطر

لكن الأعراض اللي بتظهر على الشخص المصاب بمرض السل غالبا بتكون خفيفة لكذا شهر عشان كده ممكن يتنقل من غير ماحد يحس

والأعراض الشائعة لمرض السل هي:

-السعال (أحيانا مع الدم) وآلام الصدر والضعف والتعب وفقدان الوزن والحمى والتعرق خاصة بليل..

وغالبا بتتوقف الأعراض على المكان اللي بيكون فيه السل نشط في الجسم

معلومات وحقايق عنه:
-الأبحاث بتقول أن حوالي ربع سكان العالم أصيبوا ببكتيريا السل.
-وبتظهر الأعرض على حوالي 5 ـ 10٪ من الأشخاص المصابين ببكتيريا السل وبعدها يتصابوا بالمرض.
-الأشخاص المصابين بعدوى السل ولسه متصابوش بالمرض مايقدروش ينقلوه لحد. – مرض السل بيتعالج غالبا بالمضادات الحيوية لكن بيكون قاتل لوماتعالجش.
-السل بيأثر في العادة على الرئتين لكن كمان بيأثر على الكليتين والدماغ والعمود الفقري والجلد
-سنة 2022 أصيب حوالي 10,6 ملايين شخص في العالم بالسل منهم 5,8 ملايين رجل و3,5 ملايين امرأة و1,3 مليون طفل.. وتوفى 1,3 مليون شخص بمرض السل
-يمثل السل المرض المعدي الثاني الأشد فتكاً بعد كوفيد-19

إزاي تحمي نفسك منه؟
-لو ظهرت عليك أعراضه لازم فورا تروح لدكتور لأن العلاج المبكر للسل بيساعد في وقف انتشار المرض وبيزود في فرص الشفاء و لو الدكتور وصفلك دواء للوقاية من المرض التزم بيه.
-اعمل اختبارا لعدوى السل لو كنت معرض لخطر الإصابة بيه زي إصابتك بعدوى فيروس العوز المناعي البشري أو مخالطتك لأشخاص مصابين بالسل في البيت أو الشغل
-لو  كنت مصاب بالسل اهتم بقواعد النظافة وقت السعال  وتجنب مخالطة الآخرين والبس الكمامة واعمل التدابير الخاصة زي أقنعة التنفس والتهوية للحد من العدوى.