في اليوم العالمي لموسيقى البلوز.. هي جت منين وراحت فين؟
في اليوم العالمي لموسيقى البلوز.. هي جت منين وراحت فين؟
في الأول كده وقبل ما نتكلم في أي حاجة.. يُنصح إنك تقرأ الكلام الجي وانت بتسمع الأغنية دي.
بعد الحرب الأهلية الأمريكية.. الولايات الشمالية جرمت العبودية.. لكن الولايات الجنوبية فضلت مكملة وفضلت تستفيد من العبيد الأفارقة لحد ما اتجرمت في أمريكا كلها سنة 1865.. وفي الأوقات دي فالأمريكيين من أصل أفريقي كانوا بيشتغلوا بالسخرة وكان أغلب شغلهم في الزراعة وحصد محصول القطن.. وفي وسط الحياة الصعبة اللي كانوا بيعيشوها.. كان الغناء واحد من أهم الطرق اللي بيهونوا بيه الظروف اللي هما فيه.
مصادر النوع ده من الموسيقى كانت مختلفة.. فكان منها الأغاني الروحانية واللي كانت بتتغنى في الكنيسة ومنها اللي كانت بتتغنى في حقول العمل.. ومع إنتهاء الرق في أمريكا.. فضل النوع ده من الأغاني في ذاكرة أصحابهم وفضل مكمل معاهم واتورث لولادهم كمان.
مع هجرة سكان الجنوب للشمال.. سافر معاهم عاداتهم ومزيكاتهم وأغانيهم واللي طبعًا كان منها موسيقى البلوز.. موسيقى البلوز كانت غير باقي أنواع الموسيقى لأنها كانت حقيقية وخاصة.. كانت بتحكي حكايات الناس بجد ومع تغير الزمن والأحداث.. كانت بتفضل تحكي حكاياتهم.. فهتلاقيها في أوقات بتتكلم عن العنصرية ضد السود وأوقات تانية بتمجد أفعال أبطالها.. وأوقات بتحكي عن الحب والمشاعر.
ومن جوه موسيقى البلوز.. خرجت كمان موسيقى الجاز.. بشوية اختلافات عنها.. لكنها استلهمت منها الكتير.
موسيقى البلوز هي موسيقى شخصية ومن الحتة دي بقت عالمية ويمكن عشان كده هي لسة عايشة لحد دلوقتي وبتعمل حالة خاصة بيها لما بتتسمع.. عشان هي خارجة من تجارب حقيقية.. وهتلاقيك سواء فهمتها أو لا بتستمتع بيها.. علشان المزيكا طالعة من القلب وبتقول حاجة حقيقية.
