في ذكرى ميلاده.. أبرز المحطات في حياة الكاتب والشاعر سيد حجاب

“الشمس فاكهة الشتا

الحب.. فاكهة الربيع

مين يشتري حكمة حياتي الميتة

ويردني رضيع ؟”

23 سبتمبر هو ذكرى ميلاد الكاتب وشاعر العامية الراحل سيد حجاب.. وبالمناسبة دي تعالوا نتعرف على أهم المحطات في حياته.

 سيد حجاب اتولد سنة 1940 في الدقهلية، ودخل قسم العمارة في كلية الهندسة جامعة الإسكندرية سنة 1956، وبعد كده راح جامعة القاهرة عشان يدرس هندسة التعدين سنة 1958، وماكملش دراسته فيها، وركز في كتابة الشعر العامي المصري.

“طعم الحنين ..مُر

ولساني

فيه حنين”

وبدأ بقوة في مجال الشعر العامي وده كان واضح في أول ديوان نشره “صيّاد وجنّية”، وراح ميكروفون الإذاعة من خلال مجموعة من البرامج الشعرية زي “بعد التحية والسلام” و”عمار يا مصر” و”أوركسترا”.

وكتب كمان للأطفال في مجلات مختلفة زي “سمير” و”ميكي” في الفترة من 1964 لحد 1967، وشارك في إصدار مجلة “جاليري 68” ونشر فيها شوية من أشعاره.

“صابر آه ، وآه م الصبر

الشهر شد تلات سنين كالدهر

والناس في توب القهر ما بتبرا

والناس في توب القهر ما بيقولوا”

بعدها دخل سيد حجاب مجال الأغاني بقوة، وفي البدايات غناله ناس كتير مهمة زي عفاف راضي وعبد المنعم مدبولي وصفاء أبو السعود، وكتب أغاني لفريق الأصدقاء، وكتب أغاني من ألحان بليغ حمدي غناها علي الحجار وسميرة سعيد، وكتب كمان لمحمد منير في بداياته أغنية “آه يا بلاد يا غريبة” في أول ألبوم لمنير.

سيد حجاب كمان كتب أشعار كتير لفوازير وتترات مسلسلات واتعرض كتير منهم في رمضان، واشتغل مع مجموعة مهمة جدا زي أسامة أنور عكاشة وإسماعيل عبد الحافظ وعمار الشريعي وقدموا روائع أيقونية كتير زي: 

بوابة الحلواني – الأيام – الوسية – الشهد والدموع – المال والبنون – الحقيقة والسراب – شرف فتح الباب – أرابيسك – ليالي الحلمية

“لكن دانا في كل شهر

في عروقي ميه كل بحر

وف قلبي بتموت

ميت فلوكة بميت أمل”

سيد حجاب حصل على جوايز كتير كان أبرزها جايزة “كفافيس” الدولية في الشع سنة 2005 عن مجمل أعماله، وكرمه مرض تونس الدولي للكتاب في دورته الـ 26 باعتباره رمز من رموز الشعر الشعبي في العالم العربي.

“يا اصحابي .. ولا تستغربوا

دانا كلي شوق

شوقي سؤال

سؤالي إيد

بتدق باب

وكام أيادي تدق باب .. بلا جواب !”