في ذكرى ميلاده.. اعرف مين هو الريس بيرة مؤلف أغنية”السح الدح إمبوه”

النهاردة بيوافق ذكرى ميلاد المؤلف “خليل محمد خليل” أو المعروف باسم (الريس بيرة).. اتولد في الحسين في ١٢ يونيو سنة 1922م..

وحسب حوار ليه في مجلة العربي سنة 1999م قال :”انا كنت غاوي أكون فنان شامل عملت أغاني كتيرة.. وغنيت اللون الصعيدي والموال الشعبي والطرب وغنيت طرب يجنن عشان كده أدوني المريسة سنة 1934م وكان عمري وقتها 12سنة..

وكان بيغني من صغره في القهاوي والأفراح.. وفضل لحد لما كبر بيغني ويقدم نمر في أفراح وحفلات من ضمنها حفل زفاف الملك فاروق .. لكن مكانش معروف اوي.. لـحد سنة 1972م لما غنى عدوية أغنية “السح الدح إمبوه” اللي كتبها ولحنها الريس بيرة من قبل ما يغنيها عدوية بحوالي عشرين سنة.. وكان بيغنيها مطربين تانيين غير معروفين
عشان كده كان للريس بيرة الفضل في شهرة عدوية.. لأن الأغنية أثارت الجدل وقتها بسبب كلماتها الغير مفهومة اللي لفتت نظر عاطف منتصر صاحب شركة صوت العرب لما سمع عدوية بيدندنها وقاله سيبك من المواويل هعملك أسطوانة فيها الإنية دي .. وقد كانت..  وعملت الأغنية نقلة كبيرة في الفن الشعبي وقتها رغم وجود فنانين كبار زي أم كلثوم وعبد الحليم حافظ واتهام الأغنية بإنها بتسيء للذوق العام إلا أنها اتشهرت جدا..

وبيقول “الريس بيرة” إن الأغنية جاتله من موقف مر بيه.. وهو في يوم بيصالح صاحبه على مراته .. وكانت مراته شايلة ابنها الصغير على كتفها وسابته وراحت تعملهم شاي والولد فضل يصرخ فقالها: شيلي الواد من الأرض ..الواد كده يتخض
فقالته: أدي الواد لابوه ومن هنا جت فكرة الأغنية
و”سح الدح إمبو” كان بيقولها للخروف زمان وهو بيلاعبه..

وعلى الرغم الهجوم الكبير  اللي سببه عدوية بالأغنية والاتهامات اللي خدتها الأغنية
إلا أن اللي يثبت العكس وألبوم “بنت السلطان” كان أول ألبوم مصري يتخطى المليون جنيه في مبيعاته.. ويقال إن الريس بيرة وعدوية ماشتغلوش مع بعض تاني من بعدها لكن فضل اسم الريس بيرة مرتبط بعدوية بسبب النجاح الكبير اللي حققته الأغنية




ومن الأغاني اللي كتبها الريس بيرة..

أغنية “أسمر يا سمارة يا أبودم خفيف” للفنانة شريفة فاضل



وأغنية “يا شقى ياواد يا جن” لكتكوت الأمير

واستمر الريس بيرة في الغناء في الأفراح لحد لما كبر.. وتوفى سنة 2008م.