في ذكرى ميلاد “أجاثا كريستي” أسطورة روايات الجريمة اعرف عنها وترشيحات لبعض رواياتها

النهاردة ذكرى ميلاد الكاتبة الإنجليزية الكبيرة “أجاثا كريستي” اللي اتولدت في 15 سبتمبر سنة 1890م في إنجلترا وتوفت سنة 12 يناير سنة 1976م.. و”أجاثا تعتبر من أهم وأشهر الكتاب الإنجليز في عصرها ده إن ماكانتش أشهرهم..


والحكاية بدأت مع”أجاثا” في رحلة الكتابة لما كانت بتحب تسمع لوالدتها اللي كانت شاطرة أوي في حكي القصص والحواديت.. وكانت كمان أجاثا بتحب تقرأ كتير قصص الأطفال.. وكمان باباها كان مهتم إنها تتفرج على الأفلام وكان بيخليها تقرأ الشعر معاه.. لكن للأسف كان عندها صعوبة في إنها تتعلم ورغم كده بقت من أهم الكتاب في عصرها.. وجه ده عن طريق الصدفة لما تعبت شوية وهي صغيرة ووالدتها قالتلها إنها ممكن تستغل وقت المرض ده في إنها تكتب قصة قصيرة مثلا.. وجمعت كل معلومات الجرايم اللي تسمع عنها أو عرفاها وعملت فعلا قصص بوليسية قوية..
وكانت أول رواية ليها تنشر رواية The Mysterious Affair at Styles” اللي اتنشرت سنة 1920م.. ومن بعدها عملت مجموعة كبير من المجموعات القصصية والروايات ولو أنت محب ليها أكيد شوفت روايات الجيب لأجاثا كريستي اللي كانت منتشرة في التمانينات والتسعينيات ولسه موجودة لحد دلوقتي!

ومن أشهر أعمالها الروائية:

1-خطر في البيت الأخير:
واللي بتحكي عن بنت اسمها “نيكي” في حد بيحاول يقتلها.. وصديقها “بوارو” بيحاول يحميها وبيعرض عليها طرق إنها تحمي نفسها من ضمنها إن تجيب قريبتها “ماجي” تقعد معاها.. لكن ماجي بتتقتل فياترى إيه اللي هيحصل بعد كده؟



2-جريمة في بلاد الرافدين:
والرواية بتحكي عن الممرضة”إيمي” اللي بيوظفها دكتور “إيريك”عشان تخلي بالها من مراته”لويز” لكن لويز بتموت بعد أسبوع في أوضتها.. فياترى إيه سر الجريمة؟



3-لغز القطار الأزرق:
والرواية بتحكي عن المحقق”هيركيول” اللي رايح فرنسا وعلى القطر بنلاقي “كاترين غراي” و”روث” الست الغنية جدا وفي اليوم اللي بعده بيلاقوا”روث” اتقتلت.. وبيحاول المحقق يعرف مين اللي قتلها!



4-موت اللورد إدجوير:
وبرضه فيها المحقق”هيركيول” ولكن المرة دي بتطلب منه ممثلة أمريكية إنه يطلقها من جوزها اللورد “إدجوير”وبيوافق المحقق ولكن بعدها بيلاقي اللورد اتقتل وبيحقق في الجريمة.

5-في النهاية يأتي الموت:
والرواية دي مميزة لأن أحداثها بتدور في مصر ايوه في مصر.. تحديدًا في طيبة في سنة 2000 قبل الميلاد والرواية بتحكي عن عيلة مصرية قديمة بيحصلهم حاجات غريبة وسلسة من حالات الموت فياترى دي لعنة؟

6-وجهة مجهولة:
والرواية بتحكي عن “هيلاري” اللي بتحاول إنها تنتحر لكن بيطلب منها عميل سري إنها تقوم بمهمة خطيرة بدل ماتنتحر..فياترى إيه اللي هيحصل مع “هيلاري”

من الأخر كدة كل رواية وحدوتة من “أجاثا”هتاخدك في عالم غامض وتعيشك فيه كإنه قدامك ومش هتقفل الرواية الإ لما تخلصها وتعرف السر!