في ذكرى ميلاد حنان الطويل.. قصة فنانة حبها المجتمع ورفضها
النهاردة 12 فبراير ذكرى ميلاد الفنانة “حنان الطويل” أو زي ما ناس كتير عارفينها باسم “كوريا” أو “ميس انشراح”.. واللي أدوارها من أكتر الأدوار اللي علّمت مع الناس وأثرت فيهم وخليتهم يضحكوا وفضلت عايشة معاهم حتى بعد ما ماتت.
“ميس انشراح.. مدرسة إنجليزي بتاعة ابتدائي.. وبرحب بيك.. ويلكم”
ورغم إن حنان شاركت في عدد من الأفلام اللي يتعدوا على الصوابع.. بس كل فيلم منهم كان ليها بصمة ودور مميز وإيفيهات فضلت مكملة مع الناس.. “الناظر” و”عبود على الحدود” و”55 إسعاف” و”عسكر في المعسكر” و”عايز حقي”.. وكل فيلم منهم نجحت في إنها تقدم كوميديا مختلفة وبأبسط الحركات والكلمات قدرت تضحك الناس وتحببهم فيها.
“ميرسي كتير لسه ضاربة كشري”
اتولدت حنان الطويل في 12 فبراير 1966، وبدأت مشوارها الفني سنة 1999 بعد ما عانت وصارعت في حياتها الشخصية بسبب عدم تقبل المجتمع ليها وانتقاداتهم ليها لما كانت عايشة باسم “طارق” قبل كده، وفضلت محبوسة في جسم وشكل الراجل وحابسة جواها ميولها الأنثوية لحد ما لفت في كذا دولة عربية وقررت إنها هتعمل عملية التحول الجنسي.. وخاضت الرحلة الصعبة دي لوحدها.. وقدرت تبقى عابرة من “طارق” للنجمة المشهورة “حنان الطويل”.
“البيت ده طاهر وهيفضل طول عمره طاهر”
ورغم المهارة الكوميدية والكاريزما الجميلة اللي كانت عند حنان الطويل قدام الكاميرا بس هي كانت عايشة في دوامة من التحديات الشخصية.. قبل وبعد عملية التحول الجنسي.. وحتى قرار العملية في وقتها كان قرار جريء وشجاع وقوي ومش أي حد يقدر يخوض خطوة زي دي بس هي ماكنتش قادرة تعيش في جسم “طارق” اللي كانت عايشه فيه.. وبعدها بدأت مشوارها الفني بعد كده عن طريق إنها انضمت لواحدة من فرق الفنون الاستعراضية.
“براون B خفيفة.. زي اللي انا لابساه ده.. مركز معايا ولا باصص لي في الساندويتش”
وبعدها انضمت حنان الطويل لنقابة المهن الموسيقية بسبب صوتها اللي كان فيه مساحة كبيرة واللي قدر يأهلها إنها تنجح في كل اختبارات نقابة المهن الموسيقية وبقيت عضو في نقابة المهن الموسيقية وبعدها دخلت مجال التمثيل وبقى ليها أدوار ثانوية مؤثرة في الكوميديا عاشت لحد دلوقتي زي ميس انشراح في الناظر وكوريا في عسكر في المعسكر وعزيزة في 55 إسعاف.. وتعتبر حنان هي أول عابرة جنسيا في السينما المصرية والعربية كمان.
“إيه الهيصة دي؟؟ مش عارفة أشتغل!”
وبعد فيلم عايز حقي.. عانت حنان من اكتئاب حاد.. بسبب الضغوط المجتمعية وبسبب عدم تقبل المجتمع الشرقي بصورة كاملة للعابرين جنسيا.. وعاشت كتير أوي في صراعات مع المجتمع والناس اللي حواليها بسبب تحولها.. وده اللي سبب لها اضطرابات نفسية كبيرة وصلت بيها في الأخر إنها ماقدرتش تكمل مشوارها الفني.. ودخلت مصحة رعاية نفسية.. واتقال إن دخولها المصحة ده كان بسبب بلاغ قدمه ناس من جيرانها اللي كانوا رافضين حنان أصلا ورافضين تحولها.
وللأسف بالرغم من إن كوميديا حنان الطويل لسه بتضحكنا إلا إن حياتها انتهت في ديسمبر 2004 وده معناه إنها ماتت في سن صغير (38 سنة)، بطريقة مؤسفة ومأساوية وبعيدة كل البعد عن الأدوار الكوميدية اللي عملتها.. فبعد دخولها المصحة النفسية ماتت.. واختلفت الأقاويل والكلام عن موتها.. ولحد دلوقتي ماحدش عارف السبب.. هل هو انتحار ولا ماتت بسبب شحنة كهربا زيادة ولا بسبب أزمة قلبية.
“كانت عايزة حد يطبطب عليها، أعتقد أنها فعلاً انتحرت لأنها اكتشفت أن الناس مش قادرة تتقبلها، كنت بشوف ناس كتير في التصوير بتخاف منها، كانت بتتعرض للتنمر و بتعيط وتنهار على المستوى النفسي، وكانت دايماً تسأل ليه الناس بتعاملني كده” – من حوار مع الفنانة لقاء الخميسي في يونيو 2021
