في ذكرى ميلاد فاتن حمامة.. أبرز محطات حياة سيدة الشاشة العربية

النهاردة 27 مايو هو ذكرى ميلاد النجمة المصرية فاتن حمامة اللي لقبت بسيدة الشاشة العربية، وبالمناسبة دي تعالوا نعرف أبرز وأهم المحطات في حياتها.

بداية عمرها 7 سنين

فاتن حمامة اتولدت في السنبلاوين بمحافظة الدقهلية في مصر. وكان والدها احمد حمامة بيشتغل موظف في وزارة التربية المصرية. فازت وهي صغيرة بمسابقة لجمال الأطفال، وبعدها بعت والدها صورتها للمخرج محمد كريم اللي كان بيدور على طفلة تمثل دور في فيلم “يوم سعيد” اللي كان من بطولة الموسيقار محمد عبدالوهاب. وكان ده أول دور لبها في السينما. وبكده تاريخ فاتن حمامة مع السينما يرجع لسنة 1939، لما ظهرت على الشاشة للمرة الأولى وكان عمرها 7 سنين.

سيدة الشاشة العربية

سنة 1946، انتقلت فاتن حمامة مع أسرتها للقاهرة وبدأت دراستها في المعهد العالي للتمثيل. واشتهرت الفنانة الراحلة بأدوارها في أفلام كتير جدا خلال فترة الخمسينات والستينات وأوائل السبعينات. وحصلت على جوائز كتير جدا خلال مسيرتها الفنية الطويلة، منها شهادة دكتوراه فخرية من الجامعة الأمريكية في القاهرة وشهادة دكتوراه فخرية من الجامعة الأمريكية في بيروت. وخلال مسيرتها الفنية شاركت في أكثر من 100 فيلم، وختمت مشوارها السينمائي بفيلم أرض الأحلام في 1993.

ضغوط من المخابرات ومحاولة النجاة

فاتن حمامة مشيت من مصر سنة 1966 لما انتشرت أخبار إن الاستخبارات المصرية حاولت تجنيدها للعمل لصالح الجهاز، وكان بيرأسه في الوقت ده صلاح نصر، ورفضت فاتن رفض كبير وقاطع، وسافرت بره مصر. وبعد وفاة الرئيس المصري الراحل جمال عبد الناصر رجعت لمصر سنة 1971.

نجمة القرن

في سنة 2000، اتحاد الكتاب والنقاد المصري منح فاتن حمامة لقب “نجمة القرن” في السينما المصرية. وهي نفس السنة اللي توقفت فيها عن التمثيل، وكان آخر عمل لها المسلسل التلفزيوني وجه القمر.