في كتاب بيخلوك تضحك وكتاب بيخلوك تفكر.. والنهاردة ذكرى ميلاد واحد كان بيعرف يعمل الاتنين.. لينين الرملي.. المؤلف اللي لو دورت ورا أجمد مسرحيات شوفتها وفضلت معلمة معاك هتلاقي هو اللي كتبها.. واللي كان بيميز لينين الرملي طول الوقت إنك تقدر تشوف وجهة نظره في كل عمل كتبه وبرغم كده مش هتبطل ضحك.

اتولد لينين الرملي في 18 أغسطس 1945 لأب وأم بيشتغلوا في الصحافة واتنشر ليه أول قصة قصيرة في مجلة “صباح الخير” سنة 1956 واتخرج من  بكالوريوس المعهد العالي للفنون المسرحية قسم النقد وأدب المسرح سنة 1970.

ثنائية لينين ومحمد صبحي

من أشهر الثنائيات اللي حصلت في تاريخ المسرح واللي طلعت لينا أشهر مسرحيات زي وجهة نظر.. انتهى الدرس يا غبي.. علي بيه مظهر.. الهمجي.. تخاريف.. الثنائية دي تقريبًا طلعت أحلي مسرحيات.. لدرجة إن في ناس شايفة إن بعد ما الفنان محمد صبحي بقى يعمل مسرحيات مش من تأليف لينين الرملي.. مبقاش فيه مسرحيات بقوة اللي فات.

ومش بس كده

برغم إن أشهر المسرحيات كانت مع محمد صبحي بس لينين الرملي عمل مسرحيات تانية حلوة كتير.. أشهرها مسرحية سك على بناتك.. ومسرحيات تانية زي زكي في الوزارة وعفريت لكل مواطن.

ليه لينين الرملي؟

اللي بيميز لينين الرملي بجد.. جنب موهبته اللي محدش يقدر يختلف عليها يعني إنه كان ليه بجد وجهة نظر بجد.. وتقدر تعرف إنه هو اللي كاتب لما تتفرج ومن غير ما تقرأ اسم المؤلف

حتى في الأفلام والمسلسلات

بصمة لينين الرملي ماكنتش في المسرحيات وبس.. انت تقدر تشوفها واضحة حتى في الأفلام والمسلسلات.. أفلام زي الإرهابي وبخيت وعديلة وفيلم البداية لأحمد زكي وكان بيقدر في الأفلام دي يناقش قضايا مجتمعية وسياسية حقيقية من غير ما يخلي الحدوتة بايخة أو تقيلة.. كمان مسلسلات زي هند والدكتور نعمان وحكاية ميزو.. اللي لو اتفرجت عليهم دلوقتي هتلاقي نفسك مرتبط بيهم كأنهم معمولين النهاردة.

لينين الرملي كان كان بيكتب علشان يضحكنا بس ماكنش بيسيبنا غير لما نفكر.. أو ممكن العكس محدش عارف.. بس اللي متأكدين منه إنه من غيره كان الفن المصري هيخسر كتير.