في ذكرى ميلاد مارلون براندو.. ليه The Godfather فيلم عبقري؟
بما إن النهاردة يوم 3 إبريل اللي بيوافق ذكرى ميلاد الفنان العالمي “مارلون براندو” حبينا نعملكوا مراجعة سريعة للفيلم الأيقوني The Godfather ونقولكوا ليه هو فيلم عبقري.
الفيلم من إخراج “فرانسيس فورد كوبولا “وواخد تقييم 9.2 على IMDB ويعتبر من الأفلام الأيقونية في السينما العالمية.. والمبهر مش بس الحكايات اللي ورا الفيلم زي القلق اللي عمله للمافيا الإيطالية وقتها أو كم الاستعدادات الصعبة اللي عملها “مارلون براندو” في تغيير شكله لدرجة إنه عمل تقويم في الأسنان يبين شكله زي كلب البولدوج عشان يبان مرعب في شكل “دون فيتو كورليوني” رجل العصابات والـ Godfather لعيلة كورليوني اللي تعتبر من أكبر عصابات المافيا في أمريكا وقتها
وبعد ما بيدخل الدون في مشاكل مع عصابات تانية بتؤدي لإصابته برصاصة
بتبدأ من هنا رحلة مين هياخد مكانه وهيحمي العيلة؟
الفيلم رغم إنه عن عصابات مافيا لكن فكرة الفيلم ركزت في الأساس على الإنسانيات والعلاقات بين الأبطال سواء كانوا أخوات أو علاقات حب أو حتى أعداء.. ده غير إن ركز على مقولة ” family is everything” هنلاقي العيلة بتاخد حيز كبير من الاختيارات اللي بيختارها الأبطال وبتلعب دور مهم في محور الأحداث.. فلو بتدور على فيلم أكشن وعائلي هيكون الفيلم ده مناسب ليك تشوفه.. ده غير إن الفيلم بيخلينا نفكر في سؤال مهم أوي، وهو الإنسان ممكن يعمل حاجة مش حاببها ومش قابلها عشان بس يحمي عيلته؟.. والسؤال ده هيتجاوب عليه في الفيلم
وهيخليك تفكر أكتر في مدى تأثير التجارب المختلفة على الإنسان وإزاي ممكن يتحول في لحظة 180 درجة!
ده غير إن الفيلم كمان فيه لاينات رومانسية فهتحس طول الوقت بتنوع وأنت بتتفرج ومش هتحس بزهق.. ده غير الموسيقى التصويرية للفيلم الأيقونية اللي بتساعد إننا نحس بنفس الأحاسيس اللي بيعيشوها الأبطال..
ومن مميزات الفيلم إنه بيليق مع أي عصر لو اتفرجت عليه مش هتحس إنه قديم أو مش مناسب للزمن بالعكس هتحسه سابق عصره بذكاء
فلو حاسس إنك عايز تتفرج على حاجة تستحق الكام ساعة اللي هتضيعهم من وقتك من غير ماتندم بنرشحلك فيلم The Godfather!
