في عيد ميلادها.. محطات نادين لبكي من لبنان للعالمية.. وهلأ لوين؟

“أود أن أستمر في الحديث عن شعبي وبلدي بطريقتي الخاصة” 

– نادين لبكي

18 فبراير هو عيد ميلاد المخرجة وكاتبة السيناريو والمنتجة والممثلة اللبنانية “نادين لبكي”، اللي أفلامها اترشحت وكسبت جوايز مختلفة في مهرجانات دولية وعالمية.

البداية

نادين درست الإعلام في جامعة القديس يوسف في بيروت، وكانت بدايتها مع إخراج الأغاني والفيديو كليب، وتعتبر من أشهر مخرجات الفيديو كليب العربيات، وأكتر أغاني اتشهرت بإخراجها كانت مع نانسي عجرم في كليبات مختلفة، وأخرجت أول أغانيها زي “أخاصمك آه” في 2003 اللي نجحت نجاح مش عادي، وأغاني تانية كتير زي “يا سلام”،  “ياي” ، “آه ونصّ”، وكمان عدد كبير من الكليبات لمجموعة كبيرة من النجوم زي “اطلّع فيي” لكارول سماحة، “بعينك” لنوال الزغبي، و”اعتزلت الغرام” لماجدة الرومي.

وبعد كده اتجهت للسينما والتمثيل والإخراج وكتابة السيناريو، وشاركت كممثلة لأول مرة في فيلم “البوسطة” سنة 2006.

سكر بنات – كراميل

في 2007 حضرت نادين مهرجان كان السينمائي لكتابتها فيلم “سكر بنات – كراميل” واللي كان أول فيلم سينمائي طويل لها، ولعبت فيه دور البطولة. عرض الفيلم مدينة بيروت اللي مايعرفهاش معظم الناس، وبدل ما تستعرض القضايا السياسية اللي كان زهق منها اللبنانيين، قدمت كوميديا ودراما من خلال خمس ستات لبنانيات عايشين في بيروت بيجمعهم مركز تجميل، ومن خلال الستات دول بيناقش الفيلم مواضيع زي الحب والجنس والتقاليد والإحباط والتغيرات اليومية.

الفيلم اتعرض لأول مرة في مهرجان كان السينمائي في 2007، ونجح جماهيريا جدا واتباع تقريبا في كل أنحاء العالم وحصد جوايز مهمة في مهرجانات كتير حول العالم، وبسبب الفيلم نادين بقت في قايمة أفضل 10 مخرجين في مهرجان صندانس السينمائي، وفى سنة 2008 منحتها وزارة الثقافة والإعلام الفرنسية شارة فارس وسام الفنون والآداب. الفيلم فاز بـ 5 جوايز من أصل 10 ترشيحات زي جائزة مهرجان ستوكهولم السينمائي وجائزة المتابعين وجائزة الشباب وجائزة سيباستيان ضمن مهرجان سان سيباستيان الدولي السينمائي، وجائزة من مهرجان أوسلو السينمائي.

وهلأ لوين؟

سنة 2010 أخرجت نادين ولعبت دور البطولة في تاني عمل درامي ليها: فيلم (وهلأ لوين؟) اللي اتكلم بشكل كوميدي عن موضوع حساس جدا زي الفتنة الطائفية في لبنان، من خلال قصة مجموعة من الستات اللبنانيات المسيحيات والمسلمات في واحدة من القرى اللبنانية، والستات دول بيحاولوا بكل الطرق يمنعوا الفتنة الطائفية في القرية عن طريق حلول ذكية وأحيانا غريبة وسريالية لمنع العنف ده.

وزي فيلم سكر بنات، المرأة هي مركز الفعل ومركز الحدث في فيلم “وهلأ لوين؟”.

الفيلم اتعرض لأول مرة في مهرجان كان السينمائي في فئة “Un Certain Regard” نظرة خاصة سنة 2011، وحقق الفيلم نجاح محلي ودولي وفاز بجوايز كتير برضه زي جائزة اختيار الجمهور في مهرجان تورنتو السينمائي الدولي، وجائزة Ecumenical Jury – Special Mention وجائزة François Chalais Award في مهرجان كان السينمائي، وجائزة الجمهور في مهرجان أوسلو، وجائزة في مهرجان سان سيباستيان، وجائزة الحصان الذهبي في مهرجان ستوكهولم السينمائي.

كفر ناحوم

كفر ناحوم كان من أكتر الأفلام المؤثرة اللي شهرت نادين لبكي على المستوى الدولي.

الفيلم بيسلط الضوء على معاناة الأطفال اللاجئين في لبنان، البلد اللي استقبلت أكتر من مليون لاجيء اللي هربوا من النزاع في سوريا.

الطفل السوري زين الرافعي هو البطل وعمل دور طفل بيسيب بيت أبوه وأمه بسبب إنهم جوزوا أخته القاصرة غصب عنها، وعاش حياة قاسية جدا في الشارع واتحبس ورفع قضية على أبوه وأمه علشان خلفوه في عالم ظالم وقاسي بالشكل ده.

الفيلم اترشح لجايزة الأوسكار كأفضل فيلم أجنبي، وبسببه نادين لبكي بقت أول سيدة عربية تترشح للأوسكار. الفيلم كمان اترشح لجولدن جلوب في أمريكا، وبافتا في بريطانيا وسيزار في فرنسا.

العودة إلى الإسكندرية 

آخر حاجة بتشارك فيها نادين لبكي مؤخرا هو فيلم “العودة إلى الإسكندرية” اللي بتشارك فيه بالتمثيل، وهو للمخرج السويسري المصري تامر روغلي.

نادين قالت إن الفيلم هو أول تجربة سينمائية مصرية تخوضها، وهتتكلم فيه باللغة الفرنسية واللهجة المصرية اللي اتدربت كتير جدا عليها علشان تعرف تتقنها.

نادين قالت إنها متحمسة جدا للفيلم، وحست خلال تصويره إنه تكريم ليها إنها بتشارك في فيلم مصري، لأنها بتحب مصر واللهجة المصرية وخفة دم الشعب المصري.

كل سنة وأنتي طيبة ومبدعة دايما يا نادين!