في عيد ميلاده.. بلاي ليست من أغاني أحمد سعد تليق على كل موقف في حياتك
في عيد ميلاد أحمد سعد حسينا إنه غنى أغاني كتيرة شبه حاجات في حياتنا عيشنها.. وعشن كده عملنا لك بلاي ليست من أغانيه تليق على كل موقف من مواقف حياتك:
-
فقرة جلد الذات – سألت نفسي كتير
طالما الساعة 12 جت فده ميعاد جدل الذات وتبدأ تحاسب نفسك على غلطات زمان وتحس إنك تايه ومش لاقي نفسك ولا عارف انت مين.. وقبل ما تدخل في أسئلة كيف بدأ الخلق.. افتح الفنان أحمد سعد واعرف معاه انت اللي فيك الخير ولا فيك الشر
2. لما صاحبك يتجوز – مبروك يا ابن المحظوظة
لو داخل حياة الكبار جديد ومابتعرفش تهني صح أو بتعطل في لقطة إنك بتسلم على صاحبك وعروسته.. قوله يا ابن المحظوظة مبروك واخلع بسرعة قبل ما تعك
3. الخروج من علاقة توكسيك – اليوم الحلو ده
شريكك أو شركيتك التوكسيك اللي كل صحابك حذروك/ي منه أو منها وبتقعد/ي فيها سنين مضيع/ـة على نفسك ناس بتقدرك.. بتصحى في يوم وتقرر/ي تخرجي منها هتبدأ/ي تحس/ي إن الحياة بقت أحلى وفيه ألوان غير نكده الأسود.. ساعتها كل صحابك مش هيصدقوا ويشغلوا إيه اليوم الحلو ده أخيييرًا!!
4. جنون العظمة – اختياراتي
ساعات بتجيلك لحظات إن مفيش زيك وجنون العظمة بيركبك وبتحس إنك إنسان واعي عاقل عارف هو عاوز إيه من حياته وتقول: “ششش أنا عارف أنا بعمل إيه كويس”.. لو حسيت إنك بتهز دماغك وتأكد علي كلامي استعد إنك تشغل “اختياراتي مدمرة حياتي” في أسرع وقت
5. لما تلاقي اللي بيهم كلهم – قادر أكمل
لو قعدت كتير سينجل وأخيرًا لقيت الشريك المناسب ليك اللي متقبلك بكل الـ insecurities اللي عندك.. هتبدأ تشغل الأغنية دي وتقول كلام غريب زي “يا اللي عيونك وقت ما بغرق بالنسبالي دي مركب نوح” ماتقلقش هو ده عادي انت بس بقالك كتير بعيد عن الحب والارتباط
6. عيد ميلاد صاحبك – أخويا
بدل كابشن الستوري بتاع “انت عارف اللي فيها وبتاع” اللي بتكتبه في عيد ميلاد صاحبك.. حط صورة حلوة ليكم بدل التغفيلات وعليها أغنية “أخويا ده مش صاحبي ده يا عم”
