في عيد ميلاده.. ويجز القديم راح فين؟

أحمد علي “ويجز” اسمه الفني اللي واحد من صحابه اختارهوله.. مواليد سبتمبر 1998 بيتم السنة دي 27 سنة ومن الورديان في اسكندرية بدأ مجال الراب أو التراب تقريبًا في 2017 ومع بداية 2018 شهرته كانت بتراك اسمه TNT.. في الغالب هتلاقي جدال وتساؤل هو ويجز القديم أحسن ولا دلوقتي؟ أو ويجز القديم راح فين عامة؟

حسب موقع genius وحسب مجلة forbesmiddleeast وحسب بروفايله على ساوند كلاود

بدايته

بدايته كانت في نوفمبر 2017 مع تراك “يمكن” وبعدها في ديسمبر تراك “BarbieQ” والبداية الحقيقية مارس 2018 تراك”TNT” واللي كان بينزلها على ساوند كلاود أو يوتيوب وبعدها أشهر حاجة طلعت كانت أغنية “باظت” واللي كانت طريقتها مختلفة شوية عن أغلب الحاجات وقتها

1- يمكن – ويجز

2- باربيكيو BarbieQ  – ويجز

3- TNT – ويجز

وهنا قال ويجز في حلقة “رابكة” مع Scene Noise إن كان نفسه بس التراك يجيب 10 آلاف مشاهدة في شهر بس التراك جاب ألف مشاهدة في ساعة واحدة.. وقال كمان إنه رفعه من النت بتاع القهوة عشان أسرع 

وخلال السنتين تلاتة دول حقق نجاحات في تراكات زي “مش هقولك بيبي” و”سكرتي” و”لقطة” و”ATM” و”كان نفسي” و”واحد وعشرين” 

سكرتي

لقطة

واحد وعشرين

بداية التغيير أو النقلة

مع دخول 2020 وفي وقت الكورونا وتقريبًا بعد سنتين بالظبط من انتشار تراك “TNT” اللي نزل في مارس 2018 بينزل تراك “دورك جاي” في مارس 2020 عشان يبقى بداية الانتشار الكبير لويجز ومرحلة كمان في النقلة الفنية بتاعته واللي خلال شهرين بس جابت 24 مليون مشاهدة فده أعلن وجوده على الساحة الفنية كلها مش الراب أو التراب بس لحد ما وصلت دلوقتي حوالي 140 مليون مشاهدة

وعمل نوعية جديدة بإنه اتأثر برابرز مشهورين زي Young Thug وASAP في تراكات زي “علي بابا” وتراك “لقطة” فـ مزج بين موسيقى التراب والإلكترو شعبي والمهرجانات 

وبالتدريج خلال السنين من أول 2020 بيحصل نقلة كبيرة في أرقام ويجز فبيحقق بأغنية “الغسالة” و”منحوس” أرقام أكبر من المعتاد والأرقام بتثبت عشان يدخل السنين اللي بعدها في تطور وتغيير وأرقام أكبر.. كمان خلال الفترة دي بيدخل مجال السينما والدراما سواء بإنه يغمل أغنية ليهم أو يشارك في التمثيل زي “بيمبو” مع أحمد مالك أو الأفلام زي “فوي! فوي! فوي!” أو “الغسالة”

تحول واختلاف في نوعية المزيكا 

2021 بعد الرجوع للحياة بالتدريج بعد كورونا بتحصل نقلة سواء في النوع أو الأرقام مرة تانية عشان يطلع مع ديسكو مصر بأغنية اسمها “كيفي كده” واللي وصلت دلوقتي حوالي 60 مليون مشاهدة على يوتيوب.. والسنة اللي بعدها 2022 أول نقلة بشكل كامل في النوعية عشان يعمل أغنية “البخت” اللي تعتبر أكبر رقم حققه وصل لحوالي 320 مليون مشاهدة وبعدها أغنيتين “بعودة يا بلادي” وأغنية مشابهة للبخت وهي “أميرة” ودي كانت الفترة اللي ظهر فيها ويجز بشكل مختلف تمامًا وزادت التساؤلات.. هو ويجز القديم راح فين؟!

جوائز وإنجازات

• اختاروه أكتر فنان عربي استماعًا على Deezer في 2020 وظهر في قائمة نجوم الموسيقى العربية لعام 2021 لمجلة Forbes Middle East
• كمان اتحط في قائمة “21 من أكثر الموسيقيين الشباب إثارة في العالم” “2021” لمجلة GQ وكان بيمثل الشرق الأوسط
• عمل عرض في كأس العالم لكرة القدم 2022 عشان يبقى أول فنان عربي يعمل ده
• تصدرت أغانيه زي “البخت” و”بعودة يا بلادي” اللي اتعملت في 2022 قوائم البث الموسيقي في مصر بشكل عام

في النهاية ممكن تختلف مع التطور أو التوجه اللي ويجز بيحاول يروحله كل مرحلة عشان يغير من نفسه لكن هو حقق نجاحات وإنجازات كبيرة.. لو وصلت لحد هنا قولنا هل انت مبسوط بالتطور اللي عمله أو وصله ويجز ولا مش حابب التغيير ده؟