في عيد ميلاد “جيم كاري”..عملنالكم ليست بأجمل 10 أفلام عملها

النهاردة 17 يناير اليوم اللي أتولد فيه نجم الكوميدي”جيم كاري”.. اللي ناس كتير بتحبه خاصة جيل التمانينات والتسعينات عشان كده جمعنالكم مجموعة من أجمل أفلامه الكوميدية وكمان الدراما..

1-The Truman Show

الفيلم من أجمل أفلامه بيحكي عن “ترومان” اللي بيعيش حياة عادية خالص زي كل الناس لكن بيحسس برضو أوقات إن في حاجة ناقصاه وده بيخليه يدور ورا حياته اللي بتوصله لسر كبير ومفاجات ماكانش يعرفها عنها..

2-Liar Liar

الفيلم بيحكي عن”فليتشر” اللي متعود يكدب دايما في كل المواقف عشان يخرج من أي مشكلة حتى على عيلته وفي شغله ..وفي يوم ابنه الصغير بيتمنى ان باباه يبطل كذب وبنشوف إيه اللي هيحصل بسبب دعوته.


3-Eternal Sunshine of the Spotless Mind

الفيلم لمحبي الرومانسية والأفلام عن العلاقات ..بيحكي عن “جويل” و”كليمنتين” بيتقابلوا صدفة وبيقعوا في الحب رغم اختلاف شخصياتهم ولكن بيمروا بخلافات وبينفصلوا وده بيخلي “كليمنتين” تقرر تعمل عملية تمسح فيها كل ذكرياتها مع “جويل” عشان تنساه للأبد وماتحسش بأي جرح وفعلا بتبعتله رسالة تعرفوا فيها إنها مسحته من ذكرياته وبنشوف “جويل” هيعمل إيه بعد ما يعرف ده.

4-Yes man

الفيلم بيحكي عن”كارل” وهو شخص بيمر بفترة انطفاء في حياته بتخليه يرفض يجرب أي شيء جديد في حياته لكن بيقرر يشارك في برنامج شخصي مبدأه إنه يقول اه على كل حاجةحد يطلبها منه أو أي تجربة جديدة ..وبنشوف خلال الأحداث ده هيأثر عليه إزاي.

5-The Number 23

الفيلم ده لمحبي الغموض والإثارة.. بيحكي عن “والتر” اللي بيعيش حياة روتينية لكن في يوم حياته كلها بتتغير لما زوجته بتهديه رواية في عيد ميلاده وبيكتشف إن في تشابه كبير بينه وبين بطل الرواية!

6-Man on the Moon

والفيلم ده لمحبي أفلام السيرة الذاتية بيمثل فيه جيم دور الممثل الكوميدي الراحل”أندي كوفمان” وبيورينا ازاي بدأ حياته و كل المحطات اللي حصلتله لحد مرضه بالكانسر ووفاته.

7-The Mask

وطبعا ماننساش الفيلم الأيقوني اللي معظم الناس شافته وهما صغيرين..اللي بيحكي عن “ستانلي” شخص فاشل في حياته وظروفه صعبة وده بيخليه فاقد الثقة في نفسه وفي يوم من الأيام بيلاقي ماسك بيغير حياته نهائيا.

8-Dumb and Dumber

الفيلم بيحكي عن “هاري” و”لويد” والاتنيين أغبى من بعض وده بيخليهم يتعرضوا لمواقف كوميدية كتيرة بنشوف فيها هيتصرفوا فيها إزاي.

9-Mr. Popper’s Penguins

الفيلم بيحكي عن مستر”بوبر” اللي بيورث 6 بطاريق عن والده المعروف بحبه للسفر حوالين العالم وده بيخليه مضطر يخلي باله منهم ويوفرلهم بيئة مناسبة رغم كرهه ليهم في البداية.

10-Jim & Andy: The Great Beyond

لو عايز تتعرف على جيم كاري عن قرب وتعرف عنه أكتر  فعلا يبقى لازم تشوف الفيلم التسجيلي ده اللي بيحكي عن علاقة جيم وأندي بعد تمثيله فيلم man on the moon” وازاي القصة أثرت فيه وفي حياته وخلته يعيد حساباته وتفكيره في حاجات كتير حواليه.