في عيد ميلاد سلطان المنشدين.. بلاي ليست بإنشاد الشيخ ياسين التهامي
مين فينا مش عارف أغنية أكاد من فرط الجمال أذوب.. طاب مين ماسمعهاش سواء من محل عصير قصب أو من جيرانه أو من أهله نفسهم في البيت شغلوها ورجع هو بنفسه دور عليها عشان يسمعها بعد ما علقت معاه وفي ودانه.
يمكن الأغنية دي بالذات خلت أجيال زي مواليد التسعينات والتمنينات اللي ماكنوش يعرفوا الشيخ ياسين التهامي يتعرفوا عليه ويركزوا في أغانيه ويعرفوا سر حب أهاليهم لإنشاده واللي يعتبر من أشهر المنشدين في مصر في أخر فترة وأكتر المنشدين المتجددين.. وفي عيد ميلاد “سلطان المنشدين” الـ 74 خلينا نتعرف عليه أكتر.
الشيخ ياسين التهامي اتولد يوم 6 ديسمبر سنة 1949 في قرية الحواتكة بمركز منفلوط بمحافظة أسيوط وبسبب إنه اتولد في بيت وعيلة بيُنسب ليها التدين والده خلاه يتعلم في المعاهد الأزهرية لحد ما وصل لتانية ثانوي وبعد كده انقطع عن الدراسة لظروف خاصة وده كان سنة 1970.
وبدء الأول الشيخ ياسين التهامي طريقه في إنه يكون منشد هاوي في الموالد والأفراح وقلد الشيخ أحمد التوني في الأول قبل ما يبقى له طريقته الخاصه ويأسس مدرسة في الإنشاد قلدها بعد كده منشدين كتير.. ونجح في السنين الأخيرة كمان إنه ينقل الإنشاد الديني من صورتها التقليدية اللي في الموالد والساحات الصوفية للأوبرا ومسارح أوروبا ولطبقة من المثقفين كمان وده بسبب الكلمات اللي بينشدها والموسيقى الصوفية اللي بيستخدمها.
وبمناسبة عيد ميلاد سلطان المنشدين أو كروان الصعيد أو خادم الأحباب خلينا نسمعك شوية من إنشاده وأغانيه اللي تاخد القلب:
