في يومها العالمي.. إحصائيات منظمة الصحة العالمية عن السمنة وطرق الوقاية 

يوم 4 مارس كل سنة هو اليوم العالمي للسِمْنة واللي منظمة الصحة العالمية عرفتها إنها “زيادة الوزن وتراكم غير طبيعي أو مفرط للدهون لدرجة بتشكل خطر على الصحة” 

والطريقة اللي بيتم تحديد بيها هل الشخص عنده نسبة سمنة أو لا بتعتمد على نسبة وزنة مقابل طوله.. وعادة بيتم استخدام الطريقة دي لتصنيف فرط الوزن والسمنة بين البالغين و النسبة دي بتتقاس عن طريق قسمة وزن الشخص بالكيلو على طوله بالمتر.

ومنظمة الصحة العالمية بتعترف إن فرط الوزن أو السمنة عند البالغين بيكون بالنسب دي: 

فرط الوزن هو إن ناتج قسمة وزن الجسم على الطول يكون 25 أو أكتر

والسمنة هي إن ناتج قسمة وزن الجسم على الطول 30 أو أكتر.

ولكن في الأطفال بيتم وضع السن في الاعتبار في تعريف فرط الوزن والسمنة..وبيكون فيه سمنة للأطفال اللي سنهم أقل من 5 سنين وده بيتم حسابه على حسب معايير نمو الأطفال اللي عمرهم أقل من 5 سنين حسب منظمة الصحة العالمية

وفيه سمنة كمان للأطفال اللي عمرهم بين 5 و 19 سنة وبيكون معايرها مختلفة عن حساب نسبة السمنة للأطفال اللي عمرهم أقل من 5 سنين 

منظمة الصحة العالمية قالت إن فيه حوالي 4 مليون شخص بيموتوا في العالم كل سنة نتيجة  زيادة الوزن أو السمنة ودي كانت إحصائية لحد سنة 2017.. لكن لسه برضه معدلات زيادة الوزن والسمنة مرتفعة بين البالغين والأطفال، وفي الفترة بين سنة 1975 و2016 زاد معدل انتشار الأطفال والمراهقين اللي سنهم بين 5 و19 سنة وبيعانوا من زيادة الوزن أو السمنة بأكتر من أربعة أضعاف من 4% إلى 18% عالميًا.

والسمنة هي واحد من جوانب سوء التغذية، وعدد الأشخاص اللي بيعانوا من السمنة أكبر من اللي بيعانوا من نقص الوزن في العالم كله ما عدا في أفريقيا جنوب الصحراء وفي آسيا وده حسب كلام منظمة الصحة العالمية.

زيادة الوزن والسمنة كانوا مابيمثلوش أي مشكلة زمان غير في البلاد اللي دخلها مرتفع لكن دلوقتي كمان بقوا بيزيدوا في البلاد المنخفضة والمتوسطة الدخل،وفي البيئات الحضرية كمان.. وأغلب الأطفال اللي بيعانوا منهم بيعيشوا في البلاد النامية ومعدل الزيادة أعلى بأكتر من 30% من معدل الزيادة في البلاد المتقدمة كمان.

وناس كتير بتسأل إيه اللي ممكن يسبب للشخص أو للطفل سمنة و يمكن السبب الأساسي في فرط الوزن والسمنة هو اختلال توازن الطاقة بين السعرات الحرارية اللي بيستهلكها الإنسان واللي بيحرقها جسمه، وعالميًا حصل كذا حاجة منها:

1- زيادة الأكلات الغنية بالطاقة اللي بتحتوي على قدر كبير من الدهون والسكر

2- زيادة الخمول البدني وده طبعا بسبب إن شغلانات كتير بتستدعي القعدة وعدم الحركة، وتغيّر وسائل النقل وزيادة التوسّع الحضري

3- وغالباً التغيرات في الأنظمة الغذائية وأنماط النشاط البدني سببها هو التغيرات البيئية والمجتمعية المرتبطة بالتنمية وعدم وجود دعم في قطاعات كتير زي قطاعات الصحة والزراعة والنقل والتخطيط العمراني والبيئة وتجهيز الأغذية وتوزيعها وتسويقها والتعليم.

ومع الأسف السمنة ليها عواقب صحية خطيرة على الجسم والصحة مش بس مجرد شكل أو مظهر وعواقبها الصحية هي: 

1- أمراض القلب والأوعية الدموية (ومن ضمنهم السكتات الدماغية)

2- مرض السكر

3- الاضطرابات العضلية الهيكلية زي الفصال العظمي 

4- بعض أنواع السرطان زي السرطانات اللي بتصيب الغشاء المبطن للرحم والثدي والمبيض والبروستاتا والمرارة والكلى والقولون

أما سمنة الأطفال بترتبط بزيادة احتمالات الإصابة بالوفاة المبكرة والعجز لما يبقى الطفل بالغ.. وغير الخطورة المستقبلية فالأطفال اللي بيعانوا من السمنة بيعانوا من صعوبة في التنفس، وزيادة خطورة الإصابة بالكسور وفرط ضغط الدم، ودي من العلامات المبكرة لأمراض القلب والأوعية ومقاومة الأنسولين والآثار النفسية.

أكيد طبعا سألت نفسك سؤال إزاي ممكن أحمى نفسي أو أحمي طفلي من السمنة وفرط الوزن.. خلينا نقولك شوية حاجات تعملها للوقاية وهي:

1- تقليل نسبة الدهون والسكر من إجمالي السعرات الحرارية اللي داخلة للجسم

2- وزيادة استهلاك الفاكهة والخضر والبقول والحبوب الكاملة والثمار الجوزية

3- وممارسة الرياضة أو أي نشاط بدني بانتظام (60 دقيقة في اليوم للأطفال و150 دقيقة في الأسبوع للبالغين)