كتير غنوا للرموش.. طولها.. حلاوتها.. أو حتى إنها مابتجرحش زي ما قالت الفنانة صباح “انت خايف من رموشي.. يجرحوك.. ما بيجرحوشي” بس محدش خالص جاب سيرة البربشة.. مع إنها مهمة جدًا.

بغض النظر عن إنها هتكون حاجة شكلها مخيف لو اللي قدامك مش بيبربش خالص وهتحس إنه هيقتلك.. بس البربشة ليها أهمية تانية برضه.

إزالة الجسيمات من العين

لو جسم غريب دخل العين.. فالبربشة بتساعد على إنها تشيله منها
سواء الجسم ده كان تحت الجفن أو حاجة دخلت من الهوا

ترطيب العين

العين دايمًا بتحتاج تكون مرطبة علشان مايحصلش تشوش في الرؤية
والبربشة بتقوم بالترطيب وبتمنعها من الجفاف

بنبربش قد إيه؟

المعدل الطبيعي للبربشة بيكون من 10 لـ 15 مرة في الدقيقة وممكن تقل لو بتتفرج على حاجة أو باصص في شاشة

بس هو ليه فيه ناس بتبربش كتير؟

فيه أسباب كتير ممكن تخلى الشخص يبربش أكتر من المعدل الطبيعي زي:

لو بيعاني من جفاف العين: وقتها الجسم بيدي إشارات للبربشة بشكل أكبر عشان يرطب العين

التوتر: فيه ناس حالتها النفسية بتتعكس على معدل البربشة.. فلما بيكون متوتر أو تعبان المعدل بيكون أكبر

حساسية العين: لو حصل حساسية للعين أو دخل فيها حاجة البربشة بتكون أكتر 

أسباب سلوكية: فيه ناس بتطور عادة البربشة بمعدل أكبر وده بيكون عادة سلوكية ليها علاقة بالطفولة

في النهاية البربشة مهمة.. بس الغمز مش حلو.. حبينا نقول بس