في يومهــا العالمــي.. عملنا لك بلاي ليست لأفلام الأنيميشن خدت الأوسكار

لو بتفتح أنميشنز للأطفال في عيلتكم وبتقعد تتسحل معاها وتندمج.. فنحب نقولك ماتتكسفش انت مش لوحدك.. وهنرشحلك كمان شوية أنيميشنز خدت الأوسكار مناسبة كده  للأطفال من عمر  الـ 19 سنة وانت طالع:

• Finding Nemo

جوه البحر سمكتين كل بيضهم بيموت ماعدا واحدة، يكبر وأبوه خايف عليه لحد ما يتوه منه وبيدخل في رحلة طويلة وهو بيدور عليه ويقابل السمكة “دوري” اللي بتنسى زيك كده، وعشان العلاقة القوية اللي مليانة حب وتعلق بين الأب وابنه بياخد الفيلم أوسكار سنة 2004

• Shrek

الفيلم بيحكيلك عن غول قاعد في أمان الله مع صحابه الخياليين وبيدخل عليهم دوك قصير بينفي صحابه وشرط عليه عشان يرجعهمله إنه ينقذ أميرة محجوزة في قلعة عشان يتجوزها الدوك، وبينقذها فعلًا بس في الآخر بيقعوا في حب بعض وبتحصل كام مشكلة، والفيلم خد أوسكار سنة 2002

• RATATOUILLE

الفيلم بطله فأر بيحلم يكون طباخ فبيبعد عيلته اللي بتكره البني أدمين ويروح باريس ويقعد في مطعم مشهور، وفي نفس الوقت بيجي ولد يشتغل في المطعم بس فاشل ومالوش في الشغلانة لحد ما يساعده الفأر بإنه يقعد يتحكم فيه وهو بيحرك شعره فبيبقى طباخ شاطر، الفيلم خد أوسكار سنة 2008

• BRAVE

الفيلم بيوديك لاسكتلندا بس زمان شويتين وبيحكي عن أميرة عندها مشاكل مع مامتها اللي بتتحكي في كل حاجة في شخصيتها، والأميرة نفسها تغير حياتها وتكون هي اللي بتقرر حياتها فبتعمل تعويذة عشان تتخلص من تحكم مامتها فبتقلب حياتها أكتر، الفيلم خد أوسكار سنة 2013 

• The Incredibles 

الفيلم بيحكي عن زوجين كانوا بيحاربوا الجريمة عشان هما أبطال خارقين بس مع الوقت بيقرروا يعيشوا حياة عادية ويبعدوا عن السكة دي بس الزوج بيعوز يرجع للحياة دي تاني وده بيدخلهم في حوارات كتير، والفيلم خد أوسكار سنة 2005

• Inside Out

الفيلم بيحكي عن بنت اسمها “رايلي” بتنقل من مدينة للتانية عشان أبوها غير شغله، بس هي مكنتش عايزة تنقل فبندخل جوا دماغها وبنشوف كل شعور بتعيشه زي الغضب والاشمئزاز والخوف والمشاعر دي بتحاول تساعد “رايلي” طول الفيلم إنها تستقر وتحس أحسن بعد ما نقلت المكان الجديد ده مع أهلها، والفيلم خد أوسكار سنة 2016

• Zootopia

قصة الفيلم بتحصل في مدينة للحيوانات وبطلها أرنبة حلمها تبقى ظابطة وبتحاول تثبت إنها تقدر تعمل ده للناس فبتحصل حادثة بتقرر تستسغلها عشان تثبت شطارتها وبتدخل في أكتر من مشكلة بتشككها في قدراتها مع تعلب بس في الآخر الكل بيعترف بشطارتها لما بتكشف مؤامرة كبير الفيلم خد الأوسكار سنة 2017

• Coco

الفيلم بيحكي عن ولد اسمه “ميجيل” بيحب الموسيقى جدًا بس أهله مانعينه منها ومابيحبوهاش وفي يوم الموتى في المكسيك بيقرر يروح يزور قبر أكتر موسيقار بيحبه بس في الآخر بيلاقي نفسه في أرض الموت وبيقابل قرايبه اللي ماتوا وبيعرف أسرار كتير عن عيلته، والفيلم خد الأوسكار سنة 2018

• Soul

فنان بيحب الموسيقى بيعمل حادثة قبل حدث مهم مستنيه وبتحصله حاجة غريبة جدًا وهي إن روحه بتنتقل لمكان تاني وبيبقى عايز يرجع لجسمه ويحضر الحدث اللي مستنيه بقاله كتير عشان ينبسط، وبيبدأ يشوف هيرجع إزاي لجسمه وبعد ما بيحضر الحفلة اللي نفسه فيها بقاله كتير بيكتشف إن الانبساط الرحلة مش الوصول وعشان كده الفيلم خد أوسكار سنة 2021

• ENCANTO

“ماتجيبش سيرة برونو” جملة هتفضل تسمعها طول الفيلم اللي بيحكي عن بنت عايشة في قرية صغيرة، والعيلة دي كلهم عندهم قدرات سحرية وجت عليها هي واتولدت من غير أي سحر، وبتحس إنها ملهاش فايدة ولازمة فبتدخل بقى في رحلة التدوير عن موهبتها أو القدرة السحرية بتاعتها وبتبدأ تعرف أكتر عن “برونو” قريبهم ومع نهاية الفيلم هتحس كده بإلهام إن كل حد ليه دور وأهمية كبيرة بطريقته المميزة وده اللي خلى الفيلم ياخد أوسكار سنة 2022

ورغم إن الأنيميشنز بتكون قصص بسيطة للأطفال لكنها بتدي شوية دروس ملهمة تمشي بيهم في حياتك كده.. اتفرج وانبسط!