كلنا واحنا صغيرين في المدرسة كان فيه مننا الشطار وفيه مننا اللي كار التعليم مش كارهم.. وكان فيه اللي كنا بنقول عليه “بليد” عشان مابيعرفش يقرأ ويكتب زي باقي الطلاب اللي في الفصل.. بس تعرف إنه مش شرط يكون كان بليد.. بالذات في موضوع القراءة والكتابة ده واحتمال كبير يكون كان بيعاني من الـ Dyslexia أو عسر القراءة وماحدش كان واخد باله منه؟

إيه هو عسر القراءة؟

 
عسر القراءة بيتعرف بإنه واحد من اضطرابات التعلم واللي عنده بيعاني من صعوبة في القراءة بسبب صعوبة في فك الرموز والحروف المكتوبة.. الطفل أول ما بيتولد بيتعلم يتكلم من الناس اللي حواليه وإعادة الكلمات ومعرفة معانيها مع الوقت.. لكن القراءة بتعتمد على ربط الأصوات بالرموز المكتوبة.. اللي هي الحروف يعني.. الربط ده بيخليك تعرف تقرأ وتكون الجملة.. في الطبيعي مخك بيعمل ده بشكل تلقائي بدون مجهود منك لكن في أوقات تانية.. ده مش بيحصل.

أسباب عسر القراءة كتير ومفيش سبب محدد ليها.. لكن من أبرز الأسباب هو قلة النشاط في مناطق معينة في الدماغ.. بالأخص الجزء الشمال من الدماغ واللي بينشط وقت القراءة في الطبيعي.. لكن في حالة عسر القراءة الجزء ده مش بينشط وأوقات كتير المخ بيستخدم الجزء الأيمن لتعويض ده واللي ساعات بيسبب بطء القراءة.

اللي عندهم عسر قراءة بيشوفوا الكلام إزاي؟

الموضوع مش في ازاي بيشوفوا الكلمات والجمل في الأصل.. لكن في عملية تعرف المخ على الحروف وتحويلها لكلمات منطوقة لكن اللي بيعانوا من عسر القراءة ساعات بيواجهوا مشاكل في الكلمات والحروف نفسها لما يبصوا ليها زي انهم يشوفوا الحروف والكلمات مقلوبة وممكن يحسوا إن الجملة نفسها بتتحرك من مكانها وبتنط وأوقات مش بيقدروا يفرقوا بين الحروف اللي شبه بعض زي مثلًا الـ ج والـ ح والـ خ

لو عندك طفل إزاي ممكن تكتشفي ده وتعالجيه؟

عسر القراءة ممكن يكون ليه علامات على الأطفال زي التأخر في الكلام أو صعوبة حفظ الأرقام وأسامي الألوان وفي مرحلة أكبر في السن ممكن يكون بيعاني من تأخر في مهارات القراءة والكتابة مقارنة بالأطفال في سنه.. لو ده حصل فمهم جدًا تراجعي طبيب متخصص وتساعدي الطفل عن طريق مساندته وإنك ما تحسسهوش بإنه “بليد” أو أقل من الأطفال التانية.. وفيه تدريبات مختلفة بتساعد في التعامل مع حالة عسر القراءة وتقليلها زي القراءة معاه بصوت عالي ومساعدته في القراءة والصبر عليه.

في النهاية الطفل اللي بيحصل ليه ده مش بيكون بمزاجه زي ما وضحنا ومهم جدًا مساعدته لأنه بالفعل بيكون حاسس بضغط فمساعدته ومساندته هي الحل الأمثل.