في يومه العالمي.. الوجه الذي لا تعرفه عن اللبن

يوم 1 يونيو هو اليوم العالمي لـ اللبن، ودايما الناس بتشوف إن اللبن مصدر مهم للكالسيوم والمواد المغذية التانية، خاصة للأطفال. لكن دراسات وأبحاث وخبراء كتير اقترحوا وناقشوا إنه مش جزء ضروري من النظام الغذائي الصحي للبالغين، وأحيانا بيكون ضار لو الشخص شربه بشكل كبير.

حَبّ الشباب

في دراسة اتنشرت في ScienceDirect سنة 2016 قالت إن المراهقين المصابين بحب الشباب بيشربوا كميات أكبر من اللبن قليل الدسم أو خالي الدسم. ومنتجات الألبان ممكن تؤدي لظهور حب الشباب عند البالغين برضه.

دراسات تانية ربطت بين حب الشباب وبين اللبن خالي الدسم وقليل الدسم، وممكن يكون ده بسبب تأثير اللبن على بعض الهرمونات، بما فيها الأنسولين وعامل النمو الشبيه بالأنسولين -1 (IGF-1)

الحساسية

دراسة اتنشرت في BMC  بعض الخبراء ناقشوا فيها إن حوالي 5% من الأطفال بيعانوا من حساسية الحليب، وده ممكن يسبب تفاعلات جلدية زي الإكزيما وأعراض زي المغص أو الإمساك أو الإسهال، وممكن الأطفال يتخلصوا من حساسيتهم تجاه اللبن، وفي نفس الوقت ممكن يصاب بيها البالغين.

كسور العظام

على الرغم من المعلومات المنتشرة عن لبن البقر إنه بيزود الكالسيوم في الجسم، في دراسة اتنشرت في Bmj  بتقول إن حليب البقر بيسلب الكالسيوم من العظم. البروتينات الحيوانية بتنتج الأحماض عند تكسيرها، والكالسيوم عامل ممتاز لتعادل الاحماض، وعشان عملية تحييد الأحماض وطردها، جسمنا بيستخدم الكالسيوم الموجود في الحليب، وعشان كده كل كوباية من اللبن بنشربها بترشح الكالسيوم من عظمنا. والدراسة بتقول كمان إن الأشخاص اللي بيشربوا لبن البقر كتير بيعانوا من معدلات كسور أعلى بكتير من اللي بيشربوا لبن قليل أو مابيشربوش خالص. الأبحاث بتقول إن ده ممكن يكون بسبب سكر اسمه D-galactose في الحليب. ومع ده، الدراسة وضحت إنهم محتاجين بحث أكتر قبل تقديم التوصيات الغذائية.

ودراسة تانية اتنشرت في The American Journal of Clinical Nutrition  قالت إن كسور العظام عند كبار السن بسبب هشاشة العظام بتكون أعلى في المناطق اللي بتستهلك منتجات ألبان وكالسيوم أكتر.

السرطانات

في دراسة تانية اتنشرت في The American Journal of Clinical Nutrition قالت إن الكالسيوم الزيادة من الحليب ممكن يزود من خطر الإصابة بسرطان البروستاتا. وممكن ترتبط سكريات الحليب بزيادة خطر الإصابة بسرطان المبيض.

عدم تحمل اللاكتوز

دراسة انتشرت في BPAC قالت إن ممكن يبقى صعب على الناس هضم اللاكتوز الموجود في حليب البقر، مما يؤدي إلى الغثيان والتشنجات والغازات والانتفاخ والإسهال. وممكن تتطور صعوبة هضم منتجات الألبان بمرور الوقت والأعراض تكبر وتزيد تدريجيا. 

حليب البقر بيحتوي على كمية أعلى من اللاكتوز عن حليب الحيوانات التانية، وفي دراسة اتنشرت في National Library of Medicine  سنة 2015 قالت إن 65 لـ 70% من سكان العالم عندهم شكل من أشكال عدم تحمل اللاكتوز.

الكوليسترول

موقع Peta نشر دراسة بتقول إن حصة واحدة من الحليب ممكن تحتوي على حوالي 24 مل من الكوليسترول الضار للقلب.

مضادات حيوية

موقع American Cancer Society بيقول إن غالبًا بيتم ضخ البقر بالمضادات الحيوية عشان تفضل عايشة وتنتج حليب، وإنتاج الحليب ده بيحصل في “أجواء قذرة”. والاستخدام المفرط للمضادات الحيوية دي بيساعد على زيادة البكتيريا المقاومة للمضادات الحيوية. ولما بيصاب البشر بالجراثيم دي، فالمضادات الحيوية بتكون قللت من فعاليتها وأحيانا بتكون عاجزة تماما.

الدهون المشبعة

موقع Peta نشر دراسة بتقول الحصة الواحدة من الحليب كامل الدسم بتحتوي على أكثر من 20% من الكمية اليومية الموصى بها من الدهون المشبعة.

زيادة الوزن

دراسة في Jama Network أتعملت على أكتر من 12000 طفل، قالت إن كل ما شربوا لبن أكتر، كل ما وزنهم زاد، والمفاجأة كانت إن زيادة الوزن بتحصل برضه مع شرب الحليب خالي الدسم أو قليل الدسم.

في النهاية، دراسات وأبحاث كتير اتعملت واتكلمت عن فوايد اللبن زي ما فيه دراسات وأبحاث كتير اتعملت واتكلمت عن أضراره. كل شخص بيختلف عن التاني، وكل جسم بيختلف عن التاني، وتقبل كل شخص فينا للأنظمة الغذائية بيختلف من شخص للتاني، أنت اللي تقدر تحدد الأنسب ليك من خلال البحث والقراءة والاطلاع، أو من خلال الدكتور لو أنت بتعاني من مشاكل صحية معينة وبتتطلب أكل وشرب معين.