في يومه العالمي.. شوية معلومات عن التنس في مصر

في اليوم العالمي للتنس وبما إن الفترة دي كمان أولمبياد باريس قربت واتأهلت ليها لاعبة التنس المصرية “ميار شريف”.. خلونا نعرف شوية تفاصيل عن التنس في مصر وشوية معلومات عن البطولات اللي شارك فيها لاعيبة تنس مصريين ونتعرف على تصنيفهم

الأولمبياد

اتأهلت “ميار شريف” لأولمبياد باريس 2024 وده عشان اللوائح الجديدة اللي بيكون مهم فيها التصنيف بتاع اللاعب.. على الرغم إن بطلة دورة الألعاب الأفريقية هي لاعبة التنس الكينية “أنجيلا أوكوتويو” إلا إن تصنيفها العالمي عشان برة الـ 400 ده خلاها ماتتأهلش للأولمبياد وكمان ساندرا سمير ولميس الحسين اللي برضه تصنيفهم خارجه الـ 400 أفضل لاعب على مستوى العالم ده خلاهم مايتأهلوش.. وبكده تكون المرة التانية على التوالي لميار في تأهلها للأولمبياد بعد المرة الأولى في طوكيو 2020 اللي خرجت في الدور الأول وقتها.. وبتعتبر ميار أول لاعبة تنس مصرية تتأهل للأولمبياد في تاريخ التنس المصري.

كمان عندنا محمد صفوت اللي اتأهل لأولمبياد طوكيو 2020 وخرج برضه من الدور الأول ليها وده كان بعد فوزه بالميدالية الذهبية لدورة الألعاب الأفريقية وبقى أول لاعب تنس مصري يتأهل للأولمبياد.

منتخب مصر رجال

أما منتخب مصر للتنس رجال اتأهل للمجموعة الأولى العالمية في كأس ديفيز “كأس العالم للتنس” واللي متكون من “محمد صفوت – عمرو العصراوي – كريم مأمون – أكرم السلالى- فارس زكريا” وحققوا نتايج كويسة وممكن تقرأ أكتر عن البطولة من هنا TheGlocal

ومصر هتلعب في المجموعة الأولى العالمية خلال شهر 9 اللي جاي

أما في بطولة دورة الألعاب الأفريقية 2023 حقق فيها منتخب مصر للتنس رجال الميدالية الفضية لما خسر قدام تونس في المباراة النهائية 

منتخب مصر سيدات

من إنجازات منتخب مصر سيدات اللي مكون من “ميار شريف – ساندرا سمير – لميس الحسين – ميرنا رفعت” إنهم حققوا ذهبية بطولة دورة الألعاب الأفريقية 2023 بعد ما كسبوا منتخب نيجيريا

كمان في الزوجي حققت ميرنا رفعت وساندرا سمير ذهبية زوجي السيدات للتنس في نفس البطولة 

أما على الناحية الفردية حققت لميس الحسين فضية دورة الألعاب الأفريقية 

إنجازات فردية:

حسب الاتحاد الدولي للتنس ITF 

بالنسبة لميار شريف فا هي أفضل تصنيف فردي وصلتله كان 31 لمدة 6 أسابيع في الفترة من 26 يونيو 2023 لـ 7 أغسطس 2023 وأفضل تصنيف زوجي كان 88 لمدة أسبوع في 2022 .. وبطولاتها كانت بطولة ماربيا للتنس في أسبانيا سنة 2022 وبطولة كارلسروه المفتوحة في ألمانيا 2022/2021 وبطولة بارما المفتوحة 2022 وبطولة ماكاراسكا في كرواتيا 2023 وبطولة فالنسيا المفتوحة 2023 وبطولة كولينا المفتوحة في تشيلي 2022 

وبالنسبة لمحمد صفوت أفضل تصنيف فردي وصله هو 130 لمدة أسبوع في أكتوبر 2020 وأعلى تصنيف زوجي كان 225 في سبتمبر 2016 .. وألقابه اللي حققها بطولة لاونسستون في أستراليا 2020 وأحرز 27 لقب أهمها “بطولة الفيوتشر” 

كمان ساندرا سمير واللي حققت بطولة المستقبل الدولية بشرم الشيخ وبطولة W15 Cairo وأفضل تصنيف فردي وصلتله كان 342 في أكتوبر 2020 

ولميس الحسين اللي حققت بطولات W15 Cairo وكمان W15 Monastir وأفضل تصنيف وصلتله كان 553 في 2023

وميرنا رفعت اللي حققت بطولة W15 Monastir وأعلى تصنيف وصلتله كان 737 في 2023


تفتكر مين لاعب تنس مصري يقدر يحقق إنجاز تاريخي كبير أو بطولة جراند سلام في تاريخ التنس المصري؟