عمرك شوفت واحد جدع قالك “مش قادر”؟ وحتى لو.. فمن الجدعنة تجاه نفسك برضو إنك تاخد بالك من صحتك.. وهنا هنحاول تقنعك إنك تنزل تجري وماتجريش من مخاوفك وأحزانك بس.

عشان عضلة القلب ليها تمرينة

بعكس المثل الشائع “عضلة القلب مالهاش تمرينة”.. الجري بيساعد على تحسين صحة عضلة القلب وكمان تنشيط الدورة الدموية ده غير إنه كمان بيساعد في بناء عظام أقوى وده لأنه تمرين بيعتمد على تحمل وزن الجسم.

عشان تنام مرتاح

أبحاث كتير قالت إن فيه علاقة بين الرياضة وجودة النوم.. وإن ممارسة الرياضة بما فيها الجري بيكون ليها تأثير إيجابي على النوم لمدة أطول والاستفادة منه وتنظيم الساعة البيولوجية.

عشان ماتقريفش

الدراسات أثبتت إن الجري والرياضة بتساعد على تحسين المزاج ودعم الصحة النفسية وتحسين الذاكرة.. كمان الدراسات أظهرت إن الجري ممكن يكون علاج بديل للاكتئاب – طبعًا مش بنتكلم على الاكتئاب اللي بيحتاج تدخل طبي – لكن نقدر نقول إنه بيساعد على تحسين المزاج العام.

تجري ولا تمشي؟

الجري بسرعة ممكن يحتاج لياقة عالية أو تحس إن نفسك مش مستحمل تجري.. فمش لازم تاخد سبرينت.. مفيش حد بيجري وراك.. عشان كده المشي أو الـ jogging بيحقق نفس النتيجة وهو إنك تمشي بسرعة بسيطة ومنتظمة لفترة.

تجري فين؟

مش كل الناس عندها أماكن تجري فيها أو عندها القدرة إنها تشترك في الجيم.. عشان كده المشي مفيد.. عادي إننا بدل ما نركب عربية أو مواصلات لأي مشوار صغير نحط السماعات في ودننا ونتمشاها.. برتم سريع شوية صغيرين وبخطوات منتظمة.. انت بس ابتدي وهتحس بالاختلاف.