في يومه العالمي.. وصفات أكلات بالحمص
الحمص مليان فوائد كتير زي أنه فيه عناصر غذائية “حديد.. زنك.. ماغنسيوم.. وفسفور” ومش بس كده كمان بيحتوي على بروتين وده ممكن يخليه بديل من بدائل اللحوم وله فوائد تانية كتير.. وعشان كده عملنالكم شوية وصفات لأكلات بتتعمل بالحمص
الوصفات:
1- سلطة الحمص
- المكونات:
- 2 كوباية حمص مسلوق
- 2 فص توم مهروس
- 3 معالق طحينة
- ليمونة كبيرة معصورة
- ملح وكمون
- 2 معلقة زيت زيتون
- رشة بابريكا أو شطة “اختياري”
- الطريقة:
- انقعي الحمص قبلها بليلة
- اطحني الحمص لوحده وممكن معاه مكعب تلج
- وضيفي باقي المكونات واطحنيهم كلهم مع بعض
كمان فيه سلطة الحمص العادية اللي شبه سلطة الخضار وبتكون مكوناتها كل الخضار اللي أنتي حاباه زي “الطمام والخيار والفلفل وممكن زيتون والحمص معاهم وممكن إضافة جبنة قريش” وبتكون مفيدة لو بتعمل دايت
2- طعمية الحمص “فلافل”
- المكونات:
- انقعي كوباية حمص حوالي 12 ساعة
- بصلة صغيرة
- 2 فص توم
- كزبرة خضراء وبقدونس
- ملح وفلفل أسود وليمون وكزبرة ناشفة
- الطريقة:
- خرطي البصل والتوم كويس
- جمعي المكونات كلها واطحنيها مع بعض
- هتتكون عجينة نسيبها ترتاح شوية ودي تقدري تقليها في الزيت وتعملي الطعمية
3- طاجن حمص بالسجق
- المكونات:
- 200 جم حمص جاهز
- 100 جم لحمة مفرومة “سجق”
- بصلة مفرومة
- 2 فص توم
- معلقة صغيرة ملح وفلفل أسود
- معلقة صغيرة زبدة
- صلصة طماطم
- الطريقة:
- حطي الزبدة لحد ما تدوب بعدها ضيفي البصل والتوم وشوحيهم
- ضيفي السجق واقليه شوية لحد ما يستوي
- بعدها البهارات والملح وسيبيها لحد ما تستوي خالص
- وفي طبق الحمص هتحطي السجق فوقه وشوية زيت زيتون صغيرين وبألف هنا
4- مشروب حمص الشام
- المكونات:
- نص كيلو حمص
- بصلة صغيرة
- 2 فص توم مطحون
- حبتين بندورة
- ملح زي ما تحبي
- نص معلقة سكر
- كمون بابريكا
- معلقة شطة “اختياري”
- الطريقة:
- انقعي الحمص بعد الغسيل بمياه مغلية ليلة كاملة مع تجديد المياه كل حوالي ساعتين
- اسلقي الحمص بمياه مغلية وملح ونص معلقة سكر تلات أرباع سوى كده
- ضيفي البصل والتوم والبندورة على الحمص وتهدي النار لحد ما الطبخ يكمل والصلصة تتسبك
- وفي الآخر تضيفي البهارات وتطلعيه على كده
5- بيض بالحمص
- المكونات:
- ربع كيلو حمص
- 5 طماطمات متوسطين مضروبين في الخلاط
- حتة سمنة وشوية زيت
- بصلة مفرومة
- معلقة صغيرة توم مفروم
- بيض حسب العدد المطلوب
- الطريقة:
- اغسلي الحمص وانقعيه من بالليل أو لمدة ساعة على الأقل
- في حلة نحط السمنة مع الزيت وبعدها البصل والتوم ونقلب لحد ما يتشوحوا ونضيف صلصلة الطماطم ونسيبها تتسبك
- ناخد الحمص غلوة وبعد ما الصلصة تتسبك نزود الحمص
- بعد ما يستوي الحمص تلات أرباع سوى نفقش البيض ونسيبه يستوي من غير تقليب حوالي ربع ساعة وخلاص على كده
6- كوكيز بزبدة الحمص
- المكونات:
- كوباية حمص مسلوق
- نص كوباية زبدة فول سوداني
- ربع كوباية عسل
- معلقة فانيليا
- شيكولاتة
-
- الطريقة:
- اخلطي المكونات مع بعض في الخلاط
- اعمليها كور صغيرة
- افرديها على ورقة زبدة
- حطيها في فرن متوسط لمدة حوالي 15 دقيقة
وأخيرًا الحمص مش بس إضافة أو تاتش على الأكلات.. هو ممكن يبقى أكلة شايلة نفسها أو أكلة وبيتضاف ليها حاجات.. ونحب نوجه كل الحب للحمص في يومه
