في يومه العالمي.. 10 فوائد هتحب تعرفها عن البوس
يوم 6 يوليو هو اليوم العالمي للتقبيل أو البوس واللي موجود في حياتنا بشكل يومي، طريقة سلام على العائلة والصحاب، أو طريقة للتعبير عن الحب بس النوع ده مش حياتك أساسا فا مالكش دعوة بيها.
ده خلانا نتسأل، هل البوس بكل أنواعه له فائدة؟ نعم له فوائد عقلية وجسدية وبيقولنا عليها موقع Healthline:
– تعزيز هرمونات السعادة: البوس بيحفز المخ على إطلاق مجموعة مواد كيمائية بتخليك تحس بالراحة وبتشغل كمان مراكز المتعة في الدماغ، المواد دي هي الأوكسيتوسين والدوبامين والسيروتونين ودي بتخليك تحس بالبهجة وتشجع مشاعر المودة والترابط وكمان بتعمل على خفض مستويات الكورتيزول أو هرمون التوتر.
– بيساعد على تقوية الروابط بين الشركاء
مادة الأوكسيتوسين هي مادة كيمائية لما بيتم إفرازها بتسبب مشاعر زي المودة والتعلق وده ممكن يزيد من الرضا عن العلاقة بين الطرفين خصوصا لو علاقة طويلة الأمد
– له تأثير على احترامك لذاتك
في دراسة اتعملت سنة 2016 وجدت إن المشاركين فيها والغير راضين عن مظهرهم الجسدي كان عندهم مستويات أعلى من هرمون التوتر أو الكورتيزول، وزي ما قولنا في أول نقطة إن البوس بيقلل من مستويات الهرمون ده، فا كل ما تبقى عايز تنزل مستويات الهرمون ده.. إديها بوس.
– تخفيف التوتر
زي ما قولنا في أول نقطة إن مادة الأوكسيتوسين بتزيد مع البوس، والمادة دي بتقلل من القلق وبتساعد على الاسترخاء.
– البوس بيحافظ على قلبك
التقبيل بيزود من معدل ضربات القلب واللي بتوسع الأوعية الدموية وتزود تدفق الدم وبينزل ضغط الدم وكل ده هيودينا لنقطتين مهمين.
– تخفيف التقلصات
الأوعية الدموية لما بتتوسع وبيحصل زيادة لتدفق الدم، ده بيخفف من التقلصات وبيزود المواد الكيمائية اللي بتخليك تحس بالراحة.
– مسكن كويس للصداع
توسع الأوعية الدموية وزيادة تدفق الدم بيؤدي لتخفيف ألم الصداع
– تعزيز نظام المناعة
لما بيحصل تبادل للعاب ده بيعرضك لجراثيم جديدة بتقوي جهاز المناعة، ده لقوا في دراسة اتعملت في 2014 إن الأزواج اللي بيبوسوا بعض كتير بيتشاركوا نفس الجراثيم في لعابهم وألسنتهم
– بيحسن الكوليسترول
دراسة اتعملت في 2009 لقت إن الأزواج اللي عندهم وتيرة عالية من التقبيل، وجدوا تحسن في الكوليسترول الكلي في الدم.
– تفضل شباب وكمان تحرق سعرات حرارية: التقبيل بيشغل من عضلتين لـ34 عضلة في الوش وده ممكن يساعدك على تقويتها وزيادة إنتاج الكولاجين ولذلك تفضل بشرتك أكثر نضارة وشباب وكدة.
بالإضافة إلى أن دقيقة من التقبيل بتحرق ما بين 2 لـ 26 سعرة حرارية وده معتمد على مدى نشاطك في البوسة نفسها.
