في يوم البطاطس المحمرة: 10 معلومات ماتعرفهاش عنها 

مين فينا ممكن يبقى ماكنش عايش فترة من حياته على البطاطس المحمرة؟ أو لما كان بيجوع بليل ماكنش بيقوم يعمله 2 كيلو بطاطس محمرة؟ أو مين مابيحبهاش جنب أي أكله أو حتى ياكلها سندوتشات عليها سلطة أو كاتشب ومايونيز؟ في الغالب دعيت للي اخترعها أو دعيت عليك لو هي سبب سعرات حرارية كتير بتدخل جسمك.. وبمناسبة يوم البطاطس المحمرة أو الـ French Fries خلينا نقولكوا شوية معلومات ماتعرفهاش عنها حسب ما قال موقع “thedailymeal” :

1- البطاطس المحمرة ليها أسماء كتير:

في أمريكا بيقولوا عليها “French Fries” لكن في بريطانيا بيقولوا عليها “Chips” أما لو في فرنسا بيقولوا عليها “Frites” 

2- الـ French Fries احتمال ماتكنش فرنسية ولا حاجة:

البطاطس المحمرة ليها قصص كتير عن منشأها والفرنسيين بيقولوا إنها اختراعهم شوية والأسبان شوية والبلجيكيين شوية ومحدش عارف الحقيقة، واللي بيقولوا إنها تم اختراعها في فرنسا إن أصل الحكاية إن البياعين الجائلين باعوها على جسر بونت نوف سنة 1789 لأول مرة، واللي بيقولوا إنها بلجيكية بيقولوا إن اسمها “French Fries” لإن أصلا الفرنسيين سرقوا ثقافة الأكل من بلجيكا، واللي بيقولوا إنها أسبانية شايفين إن الأسبان هم أول ناس جابت البطاطس من المحيط الأطلسي للعالم الجديد.. وبالتالي محدش عارف مين اللي اخترعها.

3- الفرد في أمريكا بياكل حوالي 30 رطل من البطاطس في السنة:

 National Geographic قالت إن المواطن الأمريكي العادي بياكل حوالي 30 رطل من البطاطس المحمرة كل سنة.

4- فيه متحف مخصوص للبطاطس المحمرة:

مش معروف فعلا إذا كانت بلجيكا هي البلد اللي اخترعت البطاطس المحمرة ولا لا والموضوع لسه بيتناقش لكن المعروف إنهم فخورين بتارخهم المرتبط بزرع البطاطس وفيه متحف كامل في بروج في بلجيكا مخصوص للبطاطس المحمرة واسمه ” Frietmuseum” والزوار فيه بيتعرفوا على تاريخ البطاطس وبيعرفوا سر البطاطس المحمرة القديمة.

5- البطاطس المحمرة هي الأكلة المفضلة للأطفال:

البطاطس المحمرة عبارة عن خضار زي ما صلصة البيتزا تعتبر فاكهة ولكن وفقًا لدراسة اتنشرت في مجلة تغذية فالبطاطس المحمرة من أكتر الخضروات اللي بيستهلكها الأطفال من عمر سنتين لـ 4 سنين. 

6- بلجيكا بتحاول تضم البطاطس المحمرة لتراثها في قايمة اليونسكو للتراث:

البلجيكيين غضبانين جدا إن البطاطس المحمرة مش من ضمن تراثهم وبيحاولوا يضموا ده لتراثهم في قايمة اليونسكو للتراث.. وقدمت بلجيكا طلب إن يتم إدراج البطاطس المحمرة والمايونيز أكل خاص بيهم.

7- البطاطس المحمرة مغذية أكتر ما إحنا فاكرين:

بالرغم إن أغلب الناس فاكرة إنها أكله سيئة جدا لصحتنا بس في الحقيقة فيها فوايد غذائية برضه لإن البطاطس خضار وفيها فيتامينات زي فيتامين ب 6 وفيتامين ج والمغنيسيوم والحديد.

8- فيه حوالي 15 نوع للبطاطس المحمرة:

البطاطس العادية، والوافل، والتخينة، والبلجيكي، والكيرلي والقطع الصغيرة والويدحز وأنواع أكتر كمان لسه وأكيد كلهم أحلى من بعض.

9- أغلب المطاعم بتقلي البطاطس أكتر من مرة:

لو بتحس إن البطاطس في البيت مش زي بتاعت برا ده لإن أغلب المطاعم بعد ما بتقلي البطاطس في زيت غزير بتطلعها تبرد شوية وتردها تاني في الزيت وبالتالي ده هيخلي البطاطس تبقى هشة ومقرمشة أكتر.

10- البطاطس المحمرة التخينة فيها دهون أقل:

كل ما كان تقطيع البطاطس أتخن كل ما قل حجم الدهون فيها وده لإن الأطراف المقرمشة دي هي أكتر مكان بيتخزن فيه دهون من القلي لكن الجزء التخين اللي جوا البطاطساية بيكون فيها نشا في الغالب.