في يوم الدماغ العالمي.. إيه هو ضباب الدماغ/ Brain fog.. وبيحصلك ليه؟
لو في شغلك وحاسس إنك مش قادر تعمل التاسكات اللي وراك.. وعمال تنسى حاجات كتير ومش قادر تركز في أبسط الحاجات فإحنا فاهمينك عامة.. بس تعرف إن اللي بتعيشه ده ممكن مايبقاش حاجة طبيعية ويكون حاجة اسمها ضباب الدماغ أو Brain fog وده اللي هنحكيلك عنه
إيه هو ضباب الدماغ/ Brain fog؟
حالة ذهنية مؤقتة بتحصل ليك وبتحس إن ذهنك مشوش وبالك مش صافي كأن فيه ضبابة عليه.. هو مش مرض لكنه عرض بيصاحب حالات مرضية وتغيرات فسيولوجية بتحصل في جسمك.. هي حالة مش ضروري تكمل معاك طول حياتك..وبتختلف أعراضها حسب شدة حالة كل شخص بين الخفيفة والشديدة لدرجة إنها ممكن تأثر على حياتك وأنشطتك خلال اليوم
إيه أعراض ضباب الدماغ؟
حسب مجلة “وومنز هيلث” الأمريكية فأعراض ضباب الدماغ أو التفكير الضبابي هي:
- الخمول والكسل
- الإرهاق والتعب الجسدي والذهني من أقل مجهود
- صعوبة التركيز والانتباه
- بتواجه صعوبة في ترتيب أفكارك بشكل واضح وبتلاقي بطء في التفكير
- انعدام قدرتك على إنك تعمل الأنشطة اليومية بتاعتك
- بتنسى كتير أسامي أو تواريخ أو السبب اللي انت رايح تعمل عشانه تاسك معين
- بتلاقي بطء في فهم المعلومات أو الاستجابة للمواقف المختلفة في حياتك
- بتلاقي صعوبة في إنك تخطط أو تحل مشكلة معينة
- مابتعرفش تاخد قرار في أبسط المواضيع بسهولة
- بتلاقي صعوبة في إنك تلاقي الكلمة المناسبة اللي عاوز تعبر بيها عن اللي في دماغك
طب إيه أسبابه؟
حسب مديرة مركز صحة الدماغ في جامعة تكساس دكتور ساندرا بوند تشابمان.. ففيه أسباب معينة بتخلي عقلك يحس بالضباب والتشوش واللي منها:
- الإجهاد والضغط النفسي: لما بتعيش حالة شديدة من الضغط والتوتر والإجهاد بتبدأ الخلايا العصبية الموجودة في دماغك تنهار ومناعة جسمك تقل وضغط دمك يزيد فتركيزك يقل ويحصل ضباب على دماغك وقدرتك على اتخاذ القرارات
- قلة النوم: وده من أكتر الأسباب اللي بتسبب الضباب الدماغي والتفكير المشوش وده ببساطة عشان قلة النوم بتخليك تحس إنك مش صاحي ويقظ.. والدكتورة “تشابمان” بتقول إنك لما مابتاخدش ساعاتك الكافية من النوم بتفوت على نفسك مهمة “تطهير الدماغ” ودي بتحصل وانت نايم فمخك بيتشتت ومابتعرفش تركز
- التغيرات الهرمونية: زي زيادة هرمون البروجسترون والإستروجين في فترة الحمل أو انخفاض نسبته في فترة الدورة الشهرية ومرحلة سن اليأس.. وأستاذة طب الأعصاب السريري في مركز جامعة نيويورك الدكتورة غاياتري ديفي بتقول إن هرمون الأستروجين لما بيقل خلال فترة قبل انقطاع الطمث.. المستقبلات الموجودة في الدماغ مابتاخدش كفايتها من الهرمون ده فالدماغ بيكون ضروري يتكيف ساعتها مع نقصه فبيحس بتشوش وكأن فيه ضبابة في دماغه
- الآثار الجانبية للأدوية: فيه مجموعة من الأدوية لما بتاخدها ممكن تسبب ضباب في الدماغ زي أدوية الصداع النصفي أو أدوية الحساسية أو أدوية النوم اللي مابتتاخدش بإشراف دكتور
- مشاكل صحية ونفسية معينة: بيكون نتيجة ليها.. زي نقص فيتامين B12 متلازمة التعب المزمن والاكتئاب والقلق المزمن والأنيميا.. وكمان قصور الغدة الدرقية والسكر وصداع الشقيقة.. والمراحل المبكرة من التصلب المتعدد أو إصابات الراس
إزاي نشخصه؟
تحاليل الدم بيتبين احتمالية وجود خلل في مستوى السكر في الدم أو مشاكل في وظايف الغدة الدرقية أو نقص في مستوى الفيتامينات أو وجود بعض الالتهابات.. ده غير إن التصوير المقطعي للدماغ والرنين المغناطيسي والأشعة السينية عشان استبعاد أي مشاكل في الدماغ هي اللي مسببة التشوش الذهني ده
إيه طرق علاج ضباب الدماغ؟
- علاج المشكلة الجسدية اللي مسببة ليه هتعالج ضبابية الدماغ سواء كانت مشكلة في الغدة الدرقية أو السكر أو أي مشكلة صحية اتكلمنا عنها
- أما لو مرتبط بحالة نفسية فانت محتاج تتابع مع معالج أو طبيب نفسي يساعدك على تخفيف القلق والاكتئاب المزمن عشان يساعدك على التفكير بوضوح
- لكن في حالة لو مفيش سبب واضح فيه مجموعة من التغييرات اللي مممكن تعملها في نظام حياتك زي إنك تاخد كفايتك من النوم من 8 لـ 9 ساعات يوميًا.. تبطل تدخين أو المشروبات الكحولية.. وتعمل رياضة ودايت محترم تمشي عليه
- قسم التاسكات الكبيرة لتاسكات أصغر عشان تقلل التشتيت واكتب ملاحظاتك كلها في نوت عشان ماتنساش أي ميعاد أو تاسك وراك.. قلل المشتتات من حواليك واختار أماكن هادية تعرف تركز فيها
