في يوم فيتامين سي.. أكلات مليانة به غير البرتقال

من واحنا صغيرين أول ما نتعب شوية ولا يجيلنا شوية برد كانوا بيقولولنا لازم ناكل برتقان أو نشرب ليمون علشان مليانين فيتامين سي بس عمرك سألت نفسك هل فى حاجات تانية غيرهم فيها فيتامين سي أكتر ولا لا؟

علشان كده فى المقالة دي جمعنالكوا كل الخضار والفاكهة اللي فيها فيتامين سي بنسبة عالية طبقا لموقع altibbi

الفاكهة اللي فيها فيتامين سي بس ماما مقالتلكش عليها غير (البرتقال و الحمضيات والجوافة و الفراولة طبعا)

الكرز الهندي: من أكتر الفاكهة اللي بتحتوي على فيتامين سي الـ 49 جرام منه فيهم حوالي 825 مجم من فيتامين سي يعني حوالي 916% من قيمة احتياجنا اليومي لفيتامين سي.

برقوق الكاكادو: البرقوقاية الواحدة منه فيها حوالي 436 مجم من فيتامين سي وكمان يعتبر من أغنى مصادر فيتامين ج علشان كده عمرنا ما شوفناه.

البابايا: من الفاكهة الغرقانة في الفيتامين سي ال 145 جرام منها فيها 88 مجم من فيتامين سي.

الكيوي: ده عارفينه عادي والواحدة المتوسطة منه فيها حوالي 56 مجم من فيتامين سي.

المانجو: الفاكهة المفضلة عندنا وتخيل كمان إنها مش بس بتدلعنا طول الصيف لا المانجاية المتوسطة فيها حوالي 122.3 مجم من فيتامين سي.

بالنسبة بقى للخضار اللي مليان فيتامين سي واحنا منعرفش هو التالي:

الفلفل الأصفر: يعتبر الراعي الرسمي لفيتامين سي فى الخضار والفلفلاية الواحدة منه فيها حوالي 342 مجم من فيتامين سي شايفين العظمة

الفلفل الأخضر الحراق: وياخد المركز التاني بعديه على طول الفلفل الأخضر الحراق والواحدة منه فيها حوالي 109 مجم فيتامين سي واضح إن عيلة الفلفل مسيطرة على فيتامين سي واحنا مانعرفش.

القرنبيط: اللي بتقعد تقول لماما مبحبوش ده وأنت مش عارف قيمته القرنبيطاية المتوسطة منه فيها 152 مجم من فيتامين سي.

الكرنب: من أكتر الخضار اللي فيه فيتامين سي والكوباية الواحدة منه فيها حوالي 80 مجم.

البروكلي: اللي أنت مبترضاش تقرب منه مع إنه حلو وجميل وصحي و نص الكوباية منه فيها حوالي 51 مجم من فيتامين سي.